इस्लामावाद । पाकिस्तानका पूर्वप्रधानमन्त्री तथा पूर्वक्रिकेट कप्तान इमरान खानलाई स्वास्थ्य परीक्षण तथा उपचारका लागि सर्वोच्च अदालतको आदेशअनुसार इस्लामावादस्थित निजी शिफा इन्टरनेसनल अस्पताल लगिएको छ।

जेलमा रहेका ७३ वर्षीय खानलाई कडा सुरक्षा व्यवस्थाबीच शुक्रबार बिहान अदियाला जेलबाट अस्पताल लगिएको हो। उनी कति समय अस्पतालमा रहनेछन् भन्नेबारे भने स्पष्ट भइसकेको छैन।

न्यायाधीश शाहिद वहीदको नेतृत्वमा रहेको तीन सदस्यीय इजलासले मंगलबार खानलाई विभिन्न विशेषज्ञ चिकित्सक सम्मिलित मेडिकल बोर्डको निगरानीमा उपचार गराउन सरकारलाई आदेश दिएको थियो। पाकिस्तान तहरीक–ए–इन्साफ (पीटीआई) ले खानको स्वास्थ्य अवस्था बिग्रँदै गएको भन्दै अस्पताल भर्नाको माग गरेपछि अदालतले यस्तो आदेश दिएको हो।

पीटीआईले विज्ञप्तिमार्फत इमरान खानलाई अदियाला जेलबाट शिफा इन्टरनेसनल अस्पतालमा सारिएको जानकारी दिएको छ।

सरकारको पुनरावलोकन निवेदन अस्वीकृत

सरकारले सर्वोच्च अदालतको आदेश पुनरावलोकन गर्न माग गर्दै निवेदन दिएको थियो। तर, आवश्यक कागजात अपूर्ण रहेको भन्दै सर्वोच्च अदालतको रजिस्ट्रार कार्यालयले उक्त निवेदन फिर्ता गरिदिएको छ।

सरकारले खानलाई उनले रोजेको निजी अस्पतालमा उपचार गर्न अनुमति दिनु विभेदपूर्ण हुने तर्क गरेको थियो। डनका अनुसार रजिस्ट्रार कार्यालयले उठाएका आपत्तिविरुद्ध सरकारले केही संशोधनसहित नयाँ निवेदन दायर गर्न सक्ने सम्भावना छ।

स्वास्थ्य अवस्थाप्रति लामो समयदेखि चिन्ता

पीटीआई र खानका कानुनी प्रतिनिधिहरूले यस वर्षको फेब्रुअरीदेखि नै उनको स्वास्थ्य अवस्थाप्रति चिन्ता व्यक्त गर्दै आएका छन्। पीटीआईले एक समय खानको दायाँ आँखाको दृष्टि १५ प्रतिशतमा सीमित भएको दाबी गरेको थियो।

त्यसपछि उनलाई इस्लामावादस्थित सरकारी पिम्स अस्पतालमा पटक–पटक छोटो समयका लागि लगिएको थियो।

यसै वर्षको सुरुवातमा पाकिस्तानका प्रधानमन्त्री शहबाज शरिफलाई १४ जना पूर्वअन्तर्राष्ट्रिय क्रिकेट कप्तानले खुला पत्र लेख्दै खानको स्वास्थ्य अवस्थाप्रति गम्भीर चिन्ता व्यक्त गरेका थिए। उनीहरूले खानलाई सम्मानजनक व्यवहार र आधारभूत मानवीय संवेदनासहित उपचारको व्यवस्था गर्न आग्रह गरेका थिए। पत्रमा ग्रेग च्यापेल, सुनील गावस्कर र कपिल देवसहितका पूर्वकप्तान सहभागी थिए।

२०२३ देखि जेलमा

इमरान खान सन् २०२३ को अगस्टदेखि रावलपिन्डीस्थित अदियाला जेलमा छन्। उनीमाथि भ्रष्टाचारलगायत विभिन्न आरोपमा सजाय सुनाइएको छ। खान र उनको पार्टीले भने आफूविरुद्ध लगाइएका आरोपहरू अस्वीकार गर्दै आएका छन्।

Originally published on abcnews.com.np.