काठमाडौँ । नेपाली कांग्रेसको १५औँ महाधिवेशन रोक्न माग गर्दै पूर्वसभापति शेरबहादुर देउवाले सर्वोच्च अदालतमा रिट दायर गरेका छन्।

देउवाले शुक्रबार वारेसमार्फत सर्वोच्चमा रिट पेस गरेका हुन्। सर्वोच्च अदालतका प्रवक्ता अर्जुन कोइरालाले रिट प्राप्त भएको तर अध्ययनकै क्रममा रहेकाले दर्ता भइनसकेको जानकारी दिए।

रिटमा कांग्रेसको १५औँ महाधिवेशनसँग सम्बन्धित सम्पूर्ण प्रक्रिया रोक्न माग गरिएको बताइएको छ।

देउवा पक्षले नेपाली कांग्रेसको आधिकारिकता गगन थापालाई दिने फैसलामा सर्वोच्च अदालतले पुनरावलोकनका लागि निस्सा दिएको अवस्थामा महाधिवेशन प्रक्रिया अघि बढाउन नमिल्ने दाबी गरेको छ।

पूर्वसभापति देउवा र पूर्वउपसभापति पूर्णबहादुर खड्काले विशेष महाधिवेशनबाट चुनिएको नेतृत्व आधिकारिक नभएको र आफूहरूकै नेतृत्व आधिकारिक रहेको दाबी गर्दै आएका छन्।

महाधिवेशनको तालिका सार्वजनिक भएपछि अदालत पुगे देउवा

गगन थापा नेतृत्वलाई १५औँ महाधिवेशन आयोजना गर्ने अधिकार नभएको र देउवाकै नेतृत्वमा महाधिवेशन हुनुपर्ने देउवा पक्षको अडान छ।

साउन २४ देखि भदौ १ गतेसम्म सानेपामा बसेको कांग्रेस बैठकले आगामी असोज १६ देखि १९ गतेसम्म १५औँ महाधिवेशन गर्ने कार्यतालिका सार्वजनिक गरेको थियो।

थापा नेतृत्वले महाधिवेशनको तालिका सार्वजनिक गर्दै प्रक्रिया अघि बढाएपछि देउवाले त्यसलाई रोक्न माग गर्दै सर्वोच्च अदालतको ढोका ढकढक्याएका हुन्।

खड्का पनि अदालत जाने तयारीमा

पूर्वउपसभापति पूर्णबहादुर खड्काले भने शुक्रबारसम्म सर्वोच्चमा रिट दायर गरेका छैनन्। उनले आफू कानुन व्यवसायीसँग परामर्शमा रहेको बताएका छन्।

‘म कानुन व्यवसायीहरूसँग परामर्शमै छु, छिट्टै म पनि अदालत जान्छु,’ खड्काले भने।

Originally published on abcnews.com.np.