काठमाडौं । निजामती कर्मचारी अस्पतालले प्रत्येक आइतबार निजामती कर्मचारी तथा उनीहरूका परिवारका लागि लक्षित विशेष ओपीडी सेवा सञ्चालन गर्ने भएको छ।
अस्पतालका अनुसार आइतबार बिहान ९ बजेदेखि दिउँसो १ बजेसम्म विशेष ओपीडी सञ्चालन हुनेछ।
विशेष ओपीडीमार्फत इन्टरनल मेडिसिन, फेमिली मेडिसिन, स्त्री तथा प्रसूति रोग, छाला रोग, नाक, कान तथा घाँटी रोग (इएनटी), रेडियोलोजी र प्याथोलोजीलगायतका सेवा उपलब्ध हुनेछन्।
अस्पतालकी सूचना अधिकारी श्रीरञ्जना नेपालका अनुसार आगामी दिनमा विशेष ओपीडीमा थप विशिष्टीकृत सेवा पनि थप गरिनेछ।
उनका अनुसार निजामती कर्मचारी तथा उनीहरूका परिवारलाई अस्पतालमा उपचारका लागि लामो समय लाइनमा बस्नुपर्ने अवस्था अन्त्य गर्दै सहज रूपमा स्वास्थ्य सेवा उपलब्ध गराउने उद्देश्यले विशेष ओपीडी सञ्चालन गर्न लागिएको हो।
Originally published on abcnews.com.np.
प्रतिक्रिया दिनुहोस्