बुटवल । रुपन्देहीको बुटवलमा जुवा खेलिरहेको अवस्थामा १ लाख ३२ हजार रुपैयाँभन्दा बढी नगदसहित नौ जनालाई प्रहरीले पक्राउ गरेको छ। पक्राउ पर्नेमा जुवा खेल्ने व्यक्तिका साथै घर भाडामा लिएर जुवा अखडा सञ्चालन गरेको आरोप लागेका दम्पतीसमेत रहेका छन्।

इलाका प्रहरी कार्यालय बुटवलका अनुसार बुटवल उपमहानगरपालिका–३, गोलपार्क क्षेत्रमा घर भाडामा लिएर जुवा सञ्चालन भइरहेको सूचनाका आधारमा प्रहरीले बिहीबार छापा मारेको थियो।

प्रहरी नायब उपरीक्षक निशान्त श्रीवास्तवका अनुसार जुवा घर सञ्चालन गरेको आरोपमा ५३ वर्षीया शिवानी शाही र उनका श्रीमान् देवकुमार शाहीलाई पक्राउ गरिएको छ। उनीहरूले जापानमा रहेका एक व्यक्तिको घर पूर्ण रूपमा भाडामा लिएर जुवा खेलाउने गरेको प्रारम्भिक अनुसन्धानबाट खुलेको प्रहरीले जनाएको छ।

छापाका क्रममा जुवा खेलिरहेका अन्य व्यक्तिसहित नौ जनालाई नियन्त्रणमा लिइएको हो। पक्राउ पर्ने अन्य व्यक्तिहरू बुटवल र पाल्पाका विभिन्न स्थानका रहेको बताइए पनि प्रहरीले उनीहरूको नाम सार्वजनिक गरेको छैन।

प्रहरीले घटनास्थलबाट १ लाख ३२ हजार रुपैयाँ नगद बरामद गरेको जनाएको छ। बरामद रकम जफत गरी पक्राउ परेकामाथि प्रचलित कानुनअनुसार जुवा खेल्ने तथा खेलाउने कसुरमा अनुसन्धान र कारबाही प्रक्रिया अघि बढाइएको छ।

प्रहरीले पछिल्लो समय बुटवल क्षेत्रमा घर तथा अन्य निजी स्थान भाडामा लिएर गोप्य रूपमा जुवा खेलाउने गतिविधि बढ्न सक्ने भन्दै यस्ता गैरकानुनी गतिविधिमाथि निगरानी र कारबाहीलाई निरन्तरता दिने जनाएको छ।

Originally published on abcnews.com.np.