काठमाडौं । राष्ट्रिय प्रजातन्त्र पार्टी (राप्रपा)ले बागमती प्रदेश सरकारमा मन्त्री बनेका आफ्ना तीन जना सांसदलाई १२ घण्टाभित्र स्पष्टीकरण पेश गर्न निर्देशन दिएको छ।

पार्टीको निर्णय र निर्देशनविपरीत प्रदेश सरकारमा सहभागी भएको भन्दै राप्रपाको केन्द्रीय कार्यसम्पादन समितिले राजु विष्ट, राजेन्द्र प्रजापति र गिरबहादुर तामाङलाई स्पष्टीकरण सोध्ने निर्णय गरेको हो।

राप्रपाका प्रवक्ता मोहनबहादुर श्रेष्ठका अनुसार केन्द्रीय अनुशासन समितिले तीनै सांसदलाई ‘किन कारबाही नगर्ने?’ भन्दै १२ घण्टाभित्र स्पष्टीकरण पेश गर्न निर्देशन दिएको छ।

राप्रपाले यसअघि संसदीय दलका नेताको निजी लेटरप्याड प्रयोग गरी बागमती प्रदेश सरकारलाई पार्टीका तर्फबाट समर्थन गरेको भन्दै प्रदेशसभा सदस्य उद्धव थापाको पार्टी सदस्यता निलम्बन गरेको थियो। साथै, उनलाई प्रदेशसभा सदस्य पदबाट समेत पदमुक्त गर्ने निर्णय गरेको थियो।

पार्टीले उक्त निर्णय र निर्देशनबारे जानकारी हुँदाहुँदै विष्ट, प्रजापति र तामाङले प्रदेश सरकारका मन्त्रीका रूपमा शपथ लिएको जनाएको छ।

को–को बने मन्त्री?

बिहीबार मुख्यमन्त्री किरण थापाको सिफारिसमा प्रदेश प्रमुख दीपकप्रसाद देवकोटाले राप्रपाका तीन सांसदलाई मन्त्री नियुक्त गरेका थिए। उनीहरूले बिहीबार नै शपथ लिएका थिए।

राजु विष्ट खानेपानी तथा ऊर्जा सिँचाइ मन्त्री, राजेन्द्र प्रजापति उद्योग, पर्यटन, श्रम तथा यातायात मन्त्री र राप्रपा संसदीय दलका उपनेता गिरबहादुर तामाङ स्वास्थ्य तथा सामाजिक विकास मन्त्री बनेका छन्।

तामाङको नेतृत्वमा राप्रपा बागमती प्रदेश सरकारमा सहभागी भएको हो।

थप कारबाही हुनसक्ने

पार्टीको निर्णय उल्लंघन गरेको निष्कर्षसहित स्पष्टीकरण मागिएको राप्रपाले जनाएको छ। तोकिएको समयभित्र प्राप्त हुने स्पष्टीकरण अध्ययन गरेपछि तीनै जनामाथि थप कारबाहीबारे निर्णय गरिने पार्टीले जनाएको छ।

Originally published on abcnews.com.np.