काठमाडौं । ‘कबड्डी’ सिरिजका तीनवटै फिल्मसहित ‘पुरानो डुङ्गा’, ‘झुम्की’, ‘घामपानी’, ‘मिस्टर झोले’, ‘आप्पा’ र ‘दिमाग खराब’जस्ता चर्चित फिल्म निर्माण गरिसकेको सिनेमा आर्टले नयाँ फिल्म निर्माणको तयारी थालेको छ ।

सिनेमा आर्टले नयाँ फिल्मका लागि निर्देशक सुयोग गुरुङ, अभिनेता अनमोल केसी र अभिनेत्री जसिता गुरुङलाई अनुबन्ध गरेको हो । निर्माता रौनक विक्रम कँडेलका अनुसार बिहीबार उनीहरूसँग औपचारिक सम्झौता गरिएको हो ।

अनमोल र जसिता पछिल्लो समय रुचाइएको जोडीका रूपमा चिनिन्छन् । नयाँ फिल्ममार्फत उनीहरू पुनः एकसाथ पर्दामा देखिन लागेका हुन् ।

फिल्मको शीर्षक भने अहिलेसम्म सार्वजनिक गरिएको छैन । निर्माता कँडेलका अनुसार फिल्मको नाम र अन्य विवरण उपयुक्त समयमा सार्वजनिक गरिनेछ । कथा, विषयवस्तु र प्राविधिक पक्षलाई समेत हाल गोप्य राखिएको छ ।

फिल्मको छायांकन आगामी मंसिरदेखि सुरु गर्ने तयारी छ । अन्य कलाकार छनोट तथा प्रि–प्रोडक्सनको काम तीव्र रूपमा अघि बढिरहेको निर्माण पक्षले जनाएको छ ।

‘ए मेरो हजुर ५’पछि अनमोल केसी सिनेमा आर्टको नयाँ फिल्ममा व्यस्त हुनेछन् ।

Originally published on abcnews.com.np.