काठमाडौँ । उपत्यकाको फोहोर व्यवस्थापनसम्बन्धी छलफलका क्रममा भएको वादविवादपछि काठमाडौँ महानगरपालिकाकी कार्यवाहक प्रमुख सुनिता डङ्गोल ले राष्ट्रिय स्वतन्त्र पार्टीकी सांसद आशिका तामाङ को व्यवहारप्रति असन्तुष्टि जनाएकी छन्। बैठकमा आफ्ना धारणा राख्ने क्रममा असहमति हुनासाथ रिसाएर हिँड्ने र अर्को वक्ताको विचारप्रति असम्मानजनक टिप्पणी गर्नु उचित नहुने उनको भनाइ थियो।

उपत्यकाको फोहोर व्यवस्थापनका विषयमा आज भएको बैठकमा सांसद तामाङ र ललितपुर महानगरपालिकाका प्रमुख चिरिबाबु महर्जन बीच केहीबेर भनाभन भएको थियो। महर्जनले आफ्नो धारणा राखिरहेकै क्रममा तामाङ बैठकस्थलबाट रिसाएर बाहिरिएकी थिइन्।

तामाङ बैठकबाट बाहिरिएपछि कार्यवाहक प्रमुख डङ्गोलले नाम नलिई असन्तुष्टि व्यक्त गर्दै लोकतान्त्रिक अभ्यासमा फरक मत राख्न पाइने भए पनि त्यसलाई असम्मानको विषय बनाउन नहुने बताइन्।

उनले भनिन्, “बैठकमा आफ्नो भनाइ राख्ने र अर्को वक्ताले आफूले जस्तो बोलेन भनेर चित्त बुझेन भन्दै असम्मान गर्न पाइँदैन। समस्याको समाधान खोज्नेतिर लाग्नुपर्छ। रिसाउने, चर्केर जाने र जथाभाबी बोल्ने काम गर्नु हुँदैन।”

‘फोहोरमा राजनीति होइन, समाधान खोजौँ’

डङ्गोलले उपत्यकाको फोहोर व्यवस्थापन जस्तो गम्भीर विषयमा राजनीतिक आरोप–प्रत्यारोपभन्दा समाधानमुखी छलफल आवश्यक रहेको बताइन्।

उनले सङ्घ, प्रदेश वा स्थानीय तहले काम गरेन भनेर एकअर्कालाई दोषारोपण गर्दै बस्नुभन्दा सबै तह मिलेर समस्याको समाधान खोज्नुपर्नेमा जोड दिइन्।

उनले भनिन्, “यो सङ्घले गरेन, प्रदेशले गरेन वा स्थानीय तहले गरेन भनेर दोष लगाउँदै जाने हो भने समाधान निस्कँदैन। समाधान खोज्नुभन्दा पहिले नै एकअर्कालाई दोषारोपण गरिरह्यौँ भने त्यो फोहोरमा राजनीति गर्नु सरह हुन्छ।”

कुन दल वा कुन राजनीतिक रङको सरकार सत्तामा छ भन्नेभन्दा पनि फोहोर व्यवस्थापनको समस्या समाधान गर्नु अहिलेको प्राथमिकता हुनुपर्ने उनको भनाइ थियो।

“अब कसको सरकार छ, कुन रङको सरकार छ भनेर नहेरौँ। सबै कुरा छोडेर समस्याको समाधान खोज्नेतर्फ लागौँ,” उनले भनिन्।

काठमाडौँ महानगर सहयोगका लागि तयार

कार्यवाहक प्रमुख डङ्गोलले फोहोर व्यवस्थापनका लागि काठमाडौँ महानगरपालिका आफ्नो जिम्मेवारी पूरा गर्न पूर्ण रूपमा तयार रहेको बताइन्।

उनले छलफलबाट आएका सुझाव र सरोकारलाई समेटेर अघि बढ्न महानगर तयार रहेको उल्लेख गरिन्।

उनले भनिन्, “हामी शतप्रतिशत प्रतिबद्ध छौँ। काठमाडौँ महानगरपालिकाबाट जे–जे गर्नुपर्छ, त्यसका लागि हामी तयार छौँ। यहाँहरूले आफ्ना सुझाव राख्न सक्नुहुन्छ। हामी केवल निर्णय सुन्ने होइनौँ, छलफलबाट अघि बढ्न चाहन्छौँ।”

उनका अनुसार काठमाडौँ उपत्यकाका सबै स्थानीय तहका प्रमुखहरू समस्या समाधानका लागि सहकार्य गर्न तयार छन्। तर समाधान खोज्ने बाटो छाडेर दोषारोपणको राजनीति गर्न नहुनेमा उनले जोड दिइन्।

वादविवादबाट संवाद खोज्नुपर्ने

बैठकमा मतभेद हुनु अस्वाभाविक नभए पनि त्यसलाई संवादको माध्यमबाट समाधान गर्नुपर्ने डङ्गोलको भनाइ थियो।

उनले भनिन्, “यो लोकतन्त्रको सुन्दर पक्ष हो कि यहाँ वादविवाद हुन्छ। तर त्यही वादविवादबाट अन्ततः संवाद खोज्नुपर्छ। आज समस्या भएर नै हामी सबै यहाँ भेला भएका हौँ। त्यसैले सबैले आफ्नो कुरा राख्दा समाधान के हो भन्ने विषयमा पनि सोच्नुपर्छ।”

आफूले सोचेअनुसार अर्को व्यक्तिले नबोलेको भन्दै रिसाउने, चर्केर प्रतिक्रिया दिने वा बैठक नै छाडेर जाने प्रवृत्तिले समस्या समाधानमा सहयोग नगर्ने उनको भनाइ थियो।

‘विगतको आरोप सुन्दै हैरान भयौँ’

डङ्गोलले फोहोर व्यवस्थापनको विषयमा विगतदेखि नै राजनीतिक स्वार्थ र आरोप–प्रत्यारोप हुने गरेको चर्चा गर्दै अब त्यो प्रवृत्तिबाट बाहिर निस्कनुपर्ने बताइन्।

“धेरै समयदेखि फोहोरमा ठूलो राजनीति हुन्छ भनेर सुन्दै आएका छौँ। तर अब धेरै कुरा परिवर्तन भइसकेका छन्,” उनले भनिन्, “पहिले कसैले फोहोरमा राजनीति गरेको भए पनि अब त्यसलाई छाडेर अघि बढौँ। फोहोरको साँच्चिकै समस्या छ भने समाधानतिर लागौँ।”

विगतमा कसले के गर्‍यो र कसले के गरेन भन्ने बहस मात्र गरिरहँदा समस्या समाधान नहुने उनको भनाइ थियो।

“तपाईँहरूले हिजोदेखि यो गरिरहनुभएको छ भन्ने भाषा सुन्दासुन्दै हैरान भइसकेका छौँ,” उनले भनिन्, “म पनि धेरै पहिले आएको व्यक्ति होइन। तर म यहाँ फोहोर व्यवस्थापनको समस्या समाधान गर्नुपर्छ भन्ने उद्देश्यका साथ अघि बढेको छु।”

उपत्यकाको फोहोर व्यवस्थापन लामो समयदेखि काठमाडौँ, ललितपुर, भक्तपुर र अन्य स्थानीय तहका लागि चुनौतीपूर्ण विषय बन्दै आएको छ। यस्ता समस्या समाधानका लागि राजनीतिक दल, स्थानीय तह, प्रदेश र सङ्घीय सरकारबीच प्रभावकारी समन्वय आवश्यक रहेको अवस्थामा बैठकमै देखिएको तिक्तताले भने उपत्यकाको फोहोर व्यवस्थापनसम्बन्धी बहसलाई थप चासोको विषय बनाएको छ।

Originally published on abcnews.com.np.