काठमाडौं । गायिका समीक्षा अधिकारीले आफ्नो मोबाइल नम्बर बिना प्रयोजन कसैलाई पनि नदिन आग्रह गरेकी छन् । एक व्यक्तिले डेढ वर्षदेखि पटक–पटक फरक–फरक नम्बरबाट फोन गरेर दुःख दिइरहेको भन्दै उनले नम्बर माग्न आउने व्यक्तिको उद्देश्य बुझेर मात्रै दिन आग्रह गरेकी हुन् ।

समीक्षाका अनुसार फोन गर्ने व्यक्तिले आफूलाई ‘रमेश शाही’ भनेर परिचय दिने गरेका छन् । तर, फोन गर्नुको कारणबारे सोध्दा आफ्नो नामबाहेक स्पष्ट जानकारी नदिने गरेको उनले बताएकी छन् ।

सामाजिक सञ्जालमा उनले लेखेकी छन्, “एउटा नम्बर ब्लक गरेपछि अर्को नम्बरबाट फेरि उही कुरा दोहोरिन्छ।”

डेढ वर्षको अवधिमा करिब ५०० वटा फरक–फरक नम्बरबाट फोन आएको र ती सबै नम्बर ब्लक गरिसकेको समीक्षाले बताएकी छन् । उनका अनुसार थप तीन जना व्यक्तिले समेत अरू व्यक्तिको मोबाइल नम्बर प्रयोग गरेर आफूलाई फोन गरिरहेका छन् ।

समीक्षाले आफ्नो नम्बर अरूलाई उपलब्ध गराउनुअघि फोन गर्ने व्यक्तिले नम्बर किन र के प्रयोजनका लागि मागेको हो भन्ने बुझ्न आग्रह गरेकी छन् ।

उनले आफ्नो नम्बर माग्ने व्यक्तिलाई नम्बर उपलब्ध गराएका व्यक्तिहरूलाई समेत आफ्नो व्यक्तिगत नम्बर अरूलाई दिनुअघि सोचेर र बुझेर मात्र उपलब्ध गराउन अनुरोध गरेकी छन् ।

Originally published on abcnews.com.np.