हेटौँडा । लामो समयदेखि बन्द रहेको हेटौँडा कपडा उद्योग पुनः सञ्चालनमा ल्याउने प्रक्रिया अघि बढिरहेका बेला उद्योग, वाणिज्य तथा आपूर्तिमन्त्री गौरीकुमारी यादवले केही महिनाभित्र उद्योगका सबै लुम सञ्चालनमा ल्याएर कपडा उत्पादन सुरु गर्ने दाबी गरेकी छन्।

शनिबार हेटौँडा कपडा उद्योगको अनुगमन गर्दै मन्त्री यादवले उद्योग सञ्चालनका लागि सरकारले अघि बढाएको काम व्यवहारमै देखिन थालेको बताइन्। बिग्रिएर थन्किएका मेसिन मर्मत गरी केही लुमबाट परीक्षण उत्पादन सुरु भइसकेको उनले जानकारी दिइन्।

‘सरकारले स्टन्टबाजी गरिरहेको भनेर चर्चा भएजस्तो अवस्था होइन। मेसिन मर्मत गरेर परीक्षण उत्पादन सुरु भइसकेको छ,’ मन्त्री यादवले भनिन्, ‘अबको केही महिनाभित्र सबै लुम सञ्चालनमा ल्याएर कपडा उत्पादन गर्छौँ।’

सरकारी उद्योग पुनः सञ्चालनमा आउन थालेपछि केही निजी उद्योगीले उद्योग सञ्चालन रोक्न विभिन्न माध्यमबाट अवरोध सिर्जना गर्न खोजेको दाबीसमेत मन्त्री यादवले गरिन्। तर, सरकारले आफ्नो निर्णयबाट पछि नहट्ने उनको भनाइ छ।

‘सरकारी उद्योग सञ्चालनमा आउन थालेपछि केही निजी उद्योगीहरूले रोक्नका लागि विभिन्न तत्त्व प्रयोग गरिरहेका छन्। तर सरकार आफ्नो निर्णयबाट पछि हट्दैन,’ उनले भनिन्।

२६ वर्षदेखि बन्द रहेको हेटौँडा कपडा उद्योगमा नेपाली सेनाको प्राविधिक टोलीले बिग्रिएर थन्किएका मेसिन मर्मत गरेपछि पुनः सञ्चालनको प्रक्रिया अघि बढेको हो।

हाल उद्योगमा १० वटा लुम सञ्चालनमा ल्याएर कपडा उत्पादनको परीक्षण भइरहेको छ। सरकारले क्रमशः उद्योगका सबै लुम सञ्चालनमा ल्याउने तयारी गरेको जनाएको छ।

Originally published on abcnews.com.np.