काठमाडौं । बलात्कारपछि हत्या गरिएकी तीन वर्षीया गरिमा चौधरीलाई न्याय माग्दै शनिबार काठमाडौंको माइतीघरमा प्रदर्शन गरिएको छ ।

स्वतन्त्र आमा नेपालको अगुवाइमा भएको प्रदर्शनमा सहभागीहरूले घटनाका दोषीलाई कडा कारबाही गर्न र पीडितलाई न्याय दिन माग गरेका छन् ।

प्रदर्शनकारीहरूले बलात्कार तथा हत्याजस्ता जघन्य अपराध नियन्त्रणका लागि कडा कानुन बनाउन सरकारसँग माग गरेका छन् । उनीहरूले बलात्कारीलाई फाँसीको सजाय दिनुपर्ने मागसमेत गरेका छन् ।

प्रदर्शनमा सहभागीहरूले ‘बलात्कारी र हत्यारालाई कडा कानुनी कारबाही गर’, ‘पीडितलाई न्याय देऊ’, ‘बलात्कारीलाई फाँसी दे’, ‘चाहिँदैन ठूला र चिल्ला सडक, छोरीलाई सुरक्षित हिँड्न सक्ने गल्ली बनाइदेऊ सरकार’ लगायतका नारा लेखिएका प्लेकार्ड बोकेका थिए ।

घटनाको पृष्ठभूमि

बाराको जीतपुर सिमरा उपमहानगरपालिका–१ की तीन वर्षीया गरिमा चौधरी साउन ३१ गतेदेखि बेपत्ता भएकी थिइन् । भदौ २ गते उनी एउटा घरभित्र मृत अवस्थामा फेला परेकी थिइन् ।

घटनामा संलग्न भएको आशंकामा केही व्यक्तिलाई पक्राउ गरी अनुसन्धान भइरहेको प्रहरीले जनाएको छ । घटनाको विस्तृत विवरण भने प्रहरीले सार्वजनिक गरेको छैन ।

Originally published on abcnews.com.np.