काठमाडौँ । श्रम संस्कृति पार्टीका अध्यक्ष एवं संसदीय दलका नेता हर्कराज राई (हर्क साम्पाङ) ले राष्ट्रिय स्वतन्त्र पार्टी (रास्वपा) का सभापति रवि लामिछानेलाई तत्काल सरकारको नेतृत्व सम्हाल्न आग्रह गरेका छन् ।

साम्पाङले शनिबार सामाजिक सञ्जालमार्फत लामिछानेलाई ढिलाइ नगरी प्रधानमन्त्रीको जिम्मेवारी सम्हाल्न आग्रह गरेका हुन् ।

उनले वर्तमान सरकारबाट सुशासन र विकासको अपेक्षा गर्न नसकिने टिप्पणी गरेका छन् । साम्पाङले लेखेका छन्, ‘रविजीले तुरुन्तै ढिलो नगरी सरकार सम्हाल्नुपर्छ। यो सरकार रहिरहने हो भने न सुशासन हुन्छ न विकास। एउटा जाबो ग्यास त ल्याएर दिन सकेको छैन अरु त उइ।’

यसअघि रास्वपाका वरिष्ठ नेता वालेन्द्र शाह (बालेन) प्रधानमन्त्री रहेका बेला पनि साम्पाङले लामिछानेलाई सरकारको नेतृत्व सम्हाल्न सुझाव दिएका थिए ।

मेयर हुँदादेखि नै बालेनको आलोचना गर्दै आएका साम्पाङले पछिल्लो समय पनि उनको नेतृत्वप्रति असन्तुष्टि जनाउँदै आएका छन् । पछिल्लो अभिव्यक्तिमार्फत उनले वर्तमान सरकारको विकल्पका रूपमा लामिछानेले नेतृत्व लिनुपर्ने धारणा सार्वजनिक गरेका हुन् ।

Originally published on abcnews.com.np.