जनकपुरधाम । धनुषाको जनकपुरधाममा पोखरीको अतिक्रमित डिल खाली गराउने अभियान सुरु गरिएको छ । शनिबार बिहानदेखि पहिलो चरणमा सातवटा पोखरीको अतिक्रमण हटाउन थालिएको हो ।

धनुषाका प्रमुख जिल्ला अधिकारी प्रेमप्रसाद लुइँटेलका अनुसार सात पोखरीको डिलमा ६५ वटा घरटहरा निर्माण गरी अतिक्रमण गरिएको छ । गोरधोइ पोखरीबाट अतिक्रमण हटाउने काम सुरु गरिएको उनले जानकारी दिए ।

गोरधोइपछि विषहरा पोखरी, रतनसागर, दशरथ तलाउ, अरगजासर, मुरलीसर र दिर्घीकासर पोखरीको अतिक्रमण हटाइनेछ ।

प्रमुख जिल्ला अधिकारी लुइँटेलका अनुसार असारको अन्तिम साता अतिक्रमित क्षेत्रको नापनक्सा गरिएको थियो । त्यसपछि सम्बन्धित स्थानमा मार्किङ गरी जग्गाधनीलाई जानकारी गराइएको र साउन १ गते अतिक्रमित जग्गा खाली गर्न सूचना जारी गरिएको थियो ।

उनले भने, “सात पोखरीमा ६५ वटा घरटहरा रहेका छन् । ती सबै भत्काइनेछ ।”

गुठी संस्थानले गत साउन १ गते अतिक्रमित जग्गा खाली गर्न सूचना जारी गरेको थियो । शुक्रबार जनकपुर नगर क्षेत्रमा माइकिङ गरेर समेत स्वेच्छाले स्थान खाली गर्न अनुरोध गरिएको थियो । तर, अतिक्रमित संरचना नहटाएपछि प्रशासनले आफैँ हटाउन थालेको हो ।

तीन चरणमा अतिक्रमण हटाइँदै

जनकपुरधाममा गुठी तथा सार्वजनिक जग्गाको अतिक्रमण हटाउने अभियान तीन चरणमा सञ्चालन गर्ने योजना छ ।

पहिलो चरणमा पोखरीका अतिक्रमित डिल खाली गराइनेछ । कुल ४९ पोखरीमध्ये यस चरणमा सातवटा पोखरीलाई अतिक्रमणमुक्त बनाइनेछ ।

त्यसपछि दोस्रो चरणमा मन्दिर परिसरका अतिक्रमित जग्गा खाली गराइनेछ भने तेस्रो चरणमा अन्य स्थानमा रहेका अतिक्रमित संरचना हटाउने योजना रहेको जनाइएको छ ।

Originally published on abcnews.com.np.