कैलाली । सुदूरपश्चिम प्रदेशका मुख्यमन्त्री खगराज भट्टले मन्त्रिपरिषद् विस्तार गरेका छन् । विस्तारित मन्त्रिपरिषद्का चार जना मन्त्री तथा राज्यमन्त्रीले आज राति साढे ८ बजे प्रदेश प्रमुखको कार्यालयमा शपथ ग्रहण गर्ने तयारी गरिएको छ ।

मुख्यमन्त्री भट्टले नेकपाबाट ओमविक्रम भाट र खुसीराम डगौरा थारूलाई मन्त्री तथा जानकी कुँवर र इन्दिरा गिरीलाई राज्यमन्त्री नियुक्त गरेका हुन् । नवनियुक्त मन्त्री तथा राज्यमन्त्रीको कार्यविभाजनसमेत टुङ्गो लगाइएको छ ।

भाटलाई भौतिक पूर्वाधार विकास मन्त्री र खुसीराम डगौरा थारूलाई आन्तरिक मामिला तथा कानुन मन्त्रीको जिम्मेवारी दिइएको छ । यस्तै, जानकी कुँवरलाई भौतिक पूर्वाधार विकास राज्यमन्त्री र इन्दिरा गिरीलाई वन राज्यमन्त्रीको जिम्मेवारी दिइएको छ ।

गत २९ गते मुख्यमन्त्री नियुक्त भएका भट्टले यसअघि नेकपा एमालेका तर्फबाट चक्र मल्ललाई आर्थिक मामिला मन्त्री, सन्तोषी थापा शर्मालाई सामाजिक विकास मन्त्री र दमन भण्डारीलाई भूमि व्यवस्था, कृषि तथा सहकारी मन्त्री नियुक्त गरिसकेका छन् ।

एमालेकै तर्फबाट जानकी बम ऐरलाई आर्थिक मामिला राज्यमन्त्रीको जिम्मेवारी दिइएको छ ।

आज नयाँ चार मन्त्री तथा राज्यमन्त्रीले शपथ लिएसँगै सुदूरपश्चिम प्रदेश सरकारको मन्त्रिपरिषद्ले पूर्णता पाउनेछ ।

Originally published on abcnews.com.np.