काठमाडौं, ८ भदौ । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले देशको वर्तमान परिस्थिति असाधारण र चुनौतीपूर्ण रहेको बताएका छन् ।

सोमबार काठमाडौंमा आयोजित ‘कम्युनिस्ट आन्दोलनमा सहकार्य, एकता र पुनर्गठन’ विषयक अन्तरक्रिया कार्यक्रममा बोल्दै उनले राष्ट्रिय स्वाधीनतामाथि गम्भीर संकट देखापरेको दाबी गरे ।

प्रचण्डले लामो संघर्ष र बलिदानबाट प्राप्त राजनीतिक उपलब्धिहरू क्रमशः कमजोर बन्दै गएको भन्दै चिन्ता व्यक्त गरे । उनले वैदेशिक तथा प्रतिक्रियावादी शक्तिको दबाब र हस्तक्षेप बढ्दै गएको दाबी गर्दै विचार मिल्ने राजनीतिक शक्तिबीच एकता र सहकार्य अपरिहार्य रहेको बताए ।

उनले शान्ति, संविधान तथा संघीय लोकतान्त्रिक गणतन्त्रका पक्षमा उभिएका शक्तिहरूबीच साझा मोर्चा निर्माण गर्नुपर्नेमा जोड दिए ।

“आज देशको परिस्थिति निकै जटिल मोडमा छ, राष्ट्रिय स्वाधीनता र प्राप्त उपलब्धिमाथि प्रहार भइरहेको छ । यो परिस्थितिमा विचार मिल्ने दलहरूबीच पार्टी एकता, तत्कालीन मुद्दामा सहकार्य र विगतमा शान्ति, संविधान एवं संघीय लोकतान्त्रिक गणतन्त्रका पक्षमा उभिएका शक्तिहरूबीच साझा मोर्चा निर्माण गर्नु आजको मुख्य आवश्यकता हो,” उनले भने ।

प्रचण्डले प्राप्त राजनीतिक उपलब्धिको रक्षा गर्दै मुलुकलाई सही दिशामा अघि बढाउन परिवर्तनकारी शक्तिहरू एकजुट हुनुपर्नेमा जोड दिए ।

Originally published on abcnews.com.np.