काठमाडौँ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले मुलुकको वर्तमान परिस्थिति असाधारण र चुनौतीपूर्ण रहेको बताएका छन् । उनले राष्ट्रिय स्वाधीनतामाथि गम्भीर सङ्कट देखापरेको दाबी गरेका छन् ।

सोमबार काठमाडौँमा आयोजित ‘कम्युनिस्ट आन्दोलनमा सहकार्य, एकता र पुनर्गठन’ विषयक अन्तरक्रिया कार्यक्रमलाई सम्बोधन गर्दै दाहालले लामो सङ्घर्ष र बलिदानबाट प्राप्त राजनीतिक उपलब्धिहरू क्रमशः कमजोर बन्दै गएको बताए ।

देशमाथि वैदेशिक तथा प्रतिक्रियावादी शक्तिको दबाब र हस्तक्षेप बढ्दै गएको दाबी गर्दै उनले विचार मिल्ने राजनीतिक शक्तिबीच एकता र सहकार्य अपरिहार्य रहेको बताए ।

दाहालले शान्ति, संविधान तथा सङ्घीय लोकतान्त्रिक गणतन्त्रका पक्षमा उभिएका शक्तिबीच साझा मोर्चा निर्माण गर्नुपर्नेमा जोड दिए ।

‘आज देशको परिस्थिति निकै जटिल मोडमा छ, राष्ट्रिय स्वाधीनता र प्राप्त उपलब्धिमाथि प्रहार भइरहेको छ । यो परिस्थितिमा विचार मिल्ने दलबीच पार्टी एकता, तत्कालीन मुद्दामा सहकार्य र विगतमा शान्ति, संविधान एवं सङ्घीय लोकतान्त्रिक गणतन्त्रका पक्षमा उभिएका शक्तिबीच साझा मोर्चा निर्माण गर्नु आजको मुख्य आवश्यकता हो,’ उनले भने ।

प्रचण्डले प्राप्त राजनीतिक उपलब्धिको रक्षा गर्दै मुलुकलाई सही दिशामा अघि बढाउन परिवर्तनकारी शक्तिहरू एकजुट हुनुपर्नेमा जोड दिए ।

Originally published on abcnews.com.np.