काठमाडौं । नेपाली कांग्रेसका पूर्वसभापति शेरबहादुर देउवा आइतबार पार्टीको संस्थापनइतर समूहको काठमाडौंस्थित चुनदेवी सम्पर्क कार्यालयमा दोस्रोपटक पुगेका छन्।

देउवाले कार्यालयमा उपस्थित नेता तथा कार्यकर्तासँग १५औँ महाधिवेशनको तयारी, पार्टीभित्रको पछिल्लो राजनीतिक अवस्था तथा समसामयिक विषयमा छलफल गरेका छन्।

यसअघि देउवा साउन २८ गते स्वदेश फर्किएलगत्तै पहिलोपटक चुनदेवीस्थित उक्त सम्पर्क कार्यालय पुगेका थिए। त्यतिबेला पनि उनले संस्थापनइतर समूहका नेता–कार्यकर्तासँग भेटघाट तथा पार्टीको आन्तरिक अवस्थाबारे छलफल गरेका थिए।

पार्टीभित्र १५औँ महाधिवेशन, नेतृत्व चयन र संगठनात्मक तयारीलाई लिएर राजनीतिक गतिविधि तीव्र भइरहेका बेला देउवाको चुनदेवीस्थित सम्पर्क कार्यालयमा दोस्रोपटकको उपस्थितिलाई अर्थपूर्ण रूपमा हेरिएको छ।

देउवाले पछिल्लो समय पार्टीभित्र विभिन्न समूहका नेता तथा कार्यकर्तासँग भेटघाट र संवादलाई निरन्तरता दिइरहेका छन्। कांग्रेसको आगामी महाधिवेशन र नेतृत्वको विषयमा आन्तरिक बहस चर्किरहेका बेला उनको सक्रियता थप बढेको देखिन्छ।

Originally published on abcnews.com.np.