काठमाडौँ । मौसम पूर्वानुमान महाशाखाले आज सोमबार देशका अधिकांश भूभागमा वर्षाको सम्भावना रहेको जनाएको छ। महाशाखाका अनुसार आज दिउँसो र राति विशेषगरी कोसी, बागमती, गण्डकी र लुम्बिनी प्रदेशका पहाडी क्षेत्रमा भारी वर्षाको समेत सम्भावना रहेको छ।

आज बिहान ८ बजेसम्म देशका कुनै पनि स्थानमा वर्षा नभएको महाशाखाले जनाएको छ। दिउँसो देशभर साधारणतया बदली रहनेछ। हिमाली क्षेत्रका केही स्थानमा मेघगर्जनसहित हल्कादेखि मध्यम वर्षा तथा हिमपातको सम्भावना छ भने पहाडी भूभागका धेरै स्थानमा मेघगर्जनसहित मध्यम वर्षा हुनसक्ने पूर्वानुमान छ।

बागमती, गण्डकी, लुम्बिनी र सुदूरपश्चिम प्रदेशका तराई क्षेत्रका केही स्थान तथा मधेस र कोसी प्रदेशका तराईका थोरै स्थानमा पनि मेघगर्जनसहित मध्यम वर्षाको सम्भावना रहेको छ।

महाशाखाले कोसी, बागमती, गण्डकी र लुम्बिनी प्रदेशका पहाडी भूभागका एक–दुई स्थानमा भारी वर्षा हुनसक्ने चेतावनी दिएको छ।

राति पनि देशभर साधारणतया बदली रहनेछ। हिमाली क्षेत्रका थोरै स्थानमा मेघगर्जनसहित मध्यम वर्षा तथा हिमपात हुनसक्नेछ। कोसी, बागमती र गण्डकीका पहाडी भूभागका केही स्थान तथा लुम्बिनी, कर्णाली र सुदूरपश्चिमका पहाडी क्षेत्रका थोरै स्थानमा मध्यम वर्षाको सम्भावना छ।

त्यस्तै, कोसी, बागमती र गण्डकीका तराई क्षेत्रका केही स्थान तथा मधेस, लुम्बिनी र सुदूरपश्चिमका तराई भूभागका थोरै स्थानमा मेघगर्जनसहित मध्यम वर्षा हुनसक्ने महाशाखाले जनाएको छ।

रातिको समयमा पनि कोसी, बागमती र गण्डकी प्रदेशका पहाडी भूभागका एक–दुई स्थानमा भारी वर्षाको सम्भावना रहेको छ।

Originally published on abcnews.com.np.