काठमाडौं । अस्ट्रेलियामा जारी टप एन्ड टी–२० सिरिजमा नेपाल ‘ए’ले आज होबर्ट हुरिक्यान्स एकेडेमीसँग प्रतिस्पर्धा गर्दै छ। खेल डार्विनस्थित मारारा क्रिकेट ग्राउन्डमा नेपाली समयअनुसार दिउँसो ३ः१५ बजे सुरु हुनेछ।

नेपाल ‘ए’ले प्रतियोगितामा लगातार दुई खेल गुमाइसकेको छ। पहिलो खेलमा आयोजक नर्दन टेरिटोरी स्ट्राइकसँग आठ विकेटले पराजित भएको नेपाल ‘ए’ दोस्रो खेलमा बंगलादेश हाई–परफर्मेन्स टिमसँग नौ विकेटले पराजित भएको थियो। त्यसैले आजको खेलमा टोली पहिलो जित निकाल्ने लक्ष्यमा हुनेछ।

यता होबर्ट हुरिक्यान्स एकेडेमी पनि प्रतियोगितामा जितविहीन छ। उसले पहिलो खेलमा भिक्टोरिया क्रिकेट संघ–११सँग पाँच विकेट तथा दोस्रो खेलमा बंगलादेश हाई–परफर्मेन्स टिमसँग तीन विकेटको हार बेहोरेको छ।

नेपाल र होबर्टबीच यसअघि पनि टप एन्ड टी–२० सिरिजमा भेट भएको थियो। गत संस्करणमा नेपालले सिनियर राष्ट्रिय टोलीलाई मैदानमा उतारेको थियो। उक्त खेलमा नेपालले होबर्ट हुरिक्यान्स एकेडेमीलाई ६६ रनले पराजित गरेको थियो। यसपटक भने नेपाल ‘ए’ सोही प्रदर्शन दोहोर्‍याउँदै प्रतियोगितामा पहिलो जित निकाल्ने प्रयासमा हुनेछ।

नेपाल ‘ए’ले यसपछि अगस्ट २६ मा एसीटी कमेट्स, अगस्ट २७ मा हाइडराबाद किङ्समेन एकेडेमी र अगस्ट २९ मा भिक्टोरिया सीए–११सँग खेल्नेछ।

Originally published on abcnews.com.np.