जनकपुर । राष्ट्रिय स्वतन्त्र पार्टी (रास्वपा) का सांसद मनीष झाले जनकपुरमा गुठीको अतिक्रमित जग्गा खाली गराउने क्रममा सरकारलाई सबैमाथि समान व्यवहार गर्न आग्रह गरेका छन्। डोजरको प्रयोग गरिब र निमुखाको आवासमा मात्र सीमित नभई पहुँचवाला र शक्तिशालीले अतिक्रमण गरेका संरचनामाथि पनि समान रूपमा हुनुपर्ने उनको माग छ।

प्रतिनिधिसभाको सोमबारको बैठकमा बोल्दै सांसद झाले जनकपुरको गुठी जग्गा अतिक्रमण हटाउने अभियानमा सरकारले निष्पक्ष र सन्तुलित ढंगले काम गर्नुपर्नेमा जोड दिएका हुन्।

उनले जनकपुरको गुठीको अतिक्रमित जग्गा पहिचान गर्न २०६२ सालमा भोजराज घिमिरेको नेतृत्वमा गठन गरिएको कार्यदलको प्रतिवेदनका आधारमा अतिक्रमण हटाउने प्रक्रिया अघि बढाइएको उल्लेख गरे। जनकपुरमा करिब ९ सय ५० बिघा गुठीको जग्गा अतिक्रमणमा परेको बताउँदै उनले त्यसको संरक्षण र फिर्ताका लागि सरकार गम्भीर र सफल हुनुपर्ने बताए।

‘यो डोजर प्रहार गरिबहरूमाथि मात्र नहोस्। सबैमाथि समान व्यवहार गरियोस् र जनकपुरको ९ सय ५० बिघा अतिक्रमण गरिएको जमिन संरक्षण गर्ने र फर्काउने अभियानमा सरकार सफल र सजग होस् भन्ने सन्तुलित अनुरोध छ,’ सांसद झाले बैठकमा भने।

उनले अतिक्रमण हटाउने अभियानका क्रममा पहुँच, हैसियत र आर्थिक अवस्थाका आधारमा फरक व्यवहार गर्न नहुने धारणा राखे। कानुनको कार्यान्वयन सबैका लागि समान हुनुपर्नेमा उनको जोड थियो।

सरकारले शनिबारदेखि जनकपुरका विभिन्न स्थानमा पोखरीको डिलमा भएका अतिक्रमित संरचना हटाउने अभियान सुरु गरेको छ। गुठी संस्थान जनकपुरधामले गिरनारी कुट्टी नजिक रहेको गोरधोइ पोखरीको अतिक्रमित डिल खाली गराउन थालेको जनाएको छ।

सांसद झाले अतिक्रमण हटाउने अभियानलाई केवल कमजोर र निम्न आय भएका समुदायमाथिको कारबाहीमा सीमित नगरी, गुठीको जग्गा अतिक्रमण गर्ने सबैमाथि समान कानुनी मापदण्ड लागू गर्न सरकारसँग माग गरेका छन्।

Originally published on abcnews.com.np.