काठमाडौं । आगामी भदौ ९ देखि १४ गतेसम्म काठमाडौंको भृकुटीमण्डपमा आयोजना हुने १८औँ नाडा अटो शोको तयारी अन्तिम चरणमा पुगेको छ।

नाडा अटोमोबाइल्स एसोसिएसन अफ नेपालले अटो शो नजिकिएसँगै प्रदर्शनीस्थलमा स्टल निर्माणको कामलाई तीव्रता दिएको हो। भृकुटीमण्डपमा अहिले विभिन्न अटोमोबाइल तथा पार्ट्सपुर्जाका स्टल निर्माणको काम धमाधम भइरहेको छ।

विभिन्न ब्रान्डले आफ्ना उत्पादन तथा नयाँ प्रविधि प्रदर्शन गर्न छुट्टाछुट्टै स्टल निर्माण गरिरहेका छन्। आयोजकका अनुसार यस वर्षको अटो शोमा ५५ ब्रान्डको सहभागिता रहनेछ भने करिब २०० स्टल रहनेछन्।

५५ ब्रान्डको सहभागिता

नाडाका अनुसार अटो शोमा २४ ब्रान्डका प्यासेन्जर कार, १७ ब्रान्डका हलुका कमर्सियल गाडी र १४ ब्रान्डका दुईपाङ्ग्रे सवारीसाधन प्रदर्शन गरिनेछ।

सवारीसाधनबाहेक ७० भन्दा बढी स्टलमा अटोमोबाइल पार्ट्स, लुब्रिकेन्ट्स, टायर, ग्यारेज उपकरणलगायतका सामग्री प्रदर्शन गरिनेछ। बैंक तथा वित्तीय संस्था र बीमा कम्पनीहरूको समेत सहभागिता रहने आयोजकले जनाएको छ।

रोबोटसमेत प्रदर्शनमा

यस वर्षको अटो शोमा सवारीसाधन र अटोमोबाइल प्रविधिसँगै अत्याधुनिक रोबोट प्रविधि पनि आकर्षणको केन्द्र बन्ने भएको छ।

आयोजकका अनुसार प्रदर्शनीमा जीआई ह्यमनोइड रोबोट र जीओ२ क्वाड्रप्ड रोबोट समेत प्रदर्शन गरिनेछ।

नाडाका अनुसार नयाँ सवारीसाधन, विद्युतीय सवारी, अटोमोबाइल प्रविधि तथा सहायक सामग्रीबारे जानकारी लिन चाहने उपभोक्ताका लागि अटो शो महत्वपूर्ण मञ्च बन्नेछ। आयोजकले प्रदर्शनीलाई व्यवस्थित र आकर्षक बनाउन स्टल निर्माण तथा अन्य व्यवस्थापनको कामलाई तीव्रता दिएको जनाएको छ।

Originally published on abcnews.com.np.