काठमाडौं । राष्ट्रिय स्वतन्त्र पार्टी (रास्वपा) की सांसद श्रद्धा कुँवरले पाकेटमारी र बलात्कारजस्ता अपराधलाई एउटै दृष्टिले हेर्न नहुने बताएकी छन् ।

प्रतिनिधिसभाको बैठकमा बोल्दै उनले प्रमाणित बलात्कारी तथा जघन्य महिला हिंसाका अपराधीलाई कडा कारबाहीको व्यवस्था गर्न सरकारसँग माग गरिन् ।

कुँवरले अपराधको प्रकृति र गम्भीरताअनुसार सजायको व्यवस्था हुनुपर्ने बताउँदै भनिन्, ‘एउटा पाकेटमारलाई र एउटा बलात्कारीलाई एउटै कारागारमा राखेर सजाय दिन मिल्दैन । प्रमाणित बलात्कारी र जघन्य महिला हिंसाका अपराधीलाई कानूनको सजायको डर यति बलियो बनाइयोस् कि अपराध गर्ने सोच नै जन्मन नपाओस् ।’

उनले संविधानको धारा १६ र १७ ले मृत्युदण्ड तथा देश निकाला जस्ता सजाय निषेध गरेको उल्लेख गर्दै महिलालाई सम्मानपूर्वक बाँच्न पाउने संवैधानिक अधिकार सुनिश्चित गर्नुपर्नेमा जोड दिइन् ।

‘एउटा छोरीलाई छोरी हुनु नै पाप जस्तो बनाइन्छ भने हामीले संविधानका अक्षर मात्र हेर्ने कि संविधानले दिएको सम्मानपूर्वक बाँच्न पाउने अधिकार पनि सुनिश्चित गर्ने ?’ उनले प्रश्न गरिन् ।

कुँवरले समाजले छोरीलाई लाज छोप्न र आत्मसुरक्षा सिकाउने मात्र नभई छोरालाई पनि मानवता, सम्मान र जिम्मेवारी सिकाउनुपर्ने बताइन् ।

उनको भनाइको भिडियो सामाजिक सञ्जालमा समेत सार्वजनिक भएको छ ।

Originally published on abcnews.com.np.