काठमाडौँ । नाडा अटो शोमा डोङफेङले नेपाली बजारका लागि दुई नयाँ विद्युतीय सवारीसाधन सार्वजनिक गरेको छ। नेपालका लागि डोङफेङको आधिकारिक बिक्रेता एमएडब्लु वृद्धिले लक्जरी इलेक्ट्रिक सेडान इपाई ००७ र अफरोड क्षमतायुक्त एम हिरो १ सार्वजनिक गरेको हो।

कम्पनीले इपाई ००७ को मूल्य ५९ लाख ९९ हजार रुपैयाँ तोकेको छ भने एम हिरो १ को मूल्य भने हालसम्म सार्वजनिक गरिएको छैन।

इपाई ००७ : ५३० किलोमिटर रेन्जको दाबी

लक्जरी सेडानका रूपमा प्रस्तुत गरिएको इपाई ००७ मा ५६.८३ किलोवाट आवर क्षमताको ब्याट्री जडान गरिएको छ। कम्पनीका अनुसार एकपटक पूर्ण चार्ज गर्दा यसले ५३० किलोमिटरसम्मको रेन्ज प्रदान गर्नेछ।

आकर्षक डिजाइन, आधुनिक प्रविधि र विद्युतीय ड्राइभिङ अनुभवसहित आएको इपाई ००७ लाई नेपाली बजारमा प्रिमियम इलेक्ट्रिक सेडान खोज्ने ग्राहकलाई लक्षित गरिएको छ।

एम हिरो १ : अफरोड क्षमतासहितको रेन्ज एक्स्टेन्डेड ईभी

त्यसैगरी, डोङफेङले नाडा अटो शोमै एम हिरो १ पनि प्रदर्शनमा राखेको छ। अफरोड क्षमतायुक्त यो रेन्ज एक्स्टेन्डेड इलेक्ट्रिक एसयूभीमा ६५.८ किलोवाट आवरको ब्याट्री रहेको छ।

कम्पनीका अनुसार, विद्युतीय मोडमा यसको रेन्ज १५६ किलोमिटरसम्म रहेको छ भने फ्युल रेन्ज एक्स्टेन्डरको सहयोगमा यसको कम्बाइन्ड रेन्ज ८०० किलोमिटरसम्म पुग्ने दाबी गरिएको छ। गाडीमा ८४ लिटर क्षमताको फ्युल ट्यांकी समेत रहेको छ।

नेपाली बजारमा थपिँदै विद्युतीय विकल्प

एमएडब्लु वृद्धिले सार्वजनिक गरेका यी दुई मोडलमध्ये इपाई ००७ लक्जरी इलेक्ट्रिक सेडान हो भने एम हिरो १ अफरोड क्षमतायुक्त रेन्ज एक्स्टेन्डेड इलेक्ट्रिक एसयूभी हो।

नाडा अटो शोमार्फत सार्वजनिक भएका यी नयाँ मोडलले नेपाली बजारमा विद्युतीय तथा नयाँ प्रविधिमा आधारित सवारीसाधनका विकल्प थप्ने अपेक्षा गरिएको छ। विशेषगरी लामो रेन्ज, प्रिमियम सुविधा र फरक ड्राइभिङ अनुभव खोज्ने ग्राहकलाई लक्षित गर्दै डोङफेङले यी मोडल नेपाली बजारमा प्रस्तुत गरेको हो।

Originally published on abcnews.com.np.