धादिङ । धादिङबाट गोसाइँकुण्ड तीर्थयात्राका लागि जाँदै गरेको एक बस बुधबार बिहानदेखि सम्पर्कविहीन भएको छ। बा ५ ख १२५० नम्बरको बेस्ट बसमा सवार २५ जना तीर्थयात्री र चालकको अवस्थाबारे हालसम्म कुनै जानकारी प्राप्त हुन सकेको छैन।

धादिङ मण्डली यातायात प्रालिका अनुसार बस धादिङबेँसीबाट बुधबार बिहान रिजर्भ लिएर गोसाइँकुण्डतर्फ प्रस्थान गरेको थियो। तर रसुवा क्षेत्रमा भीषण बाढी आएको जानकारी पाएपछि बसका चालकसँग सम्पर्क गर्ने प्रयास गर्दा फोन सम्पर्क हुन नसकेको प्रालिले जनाएको छ।

बसमा नीलकण्ठ नगरपालिका र सिद्धलेक गाउँपालिकाका विभिन्न स्थानका तीर्थयात्री सवार रहेको बताइएको छ। बसका चालक नीलकण्ठ नगरपालिका–१२ का छविलाल श्रेष्ठ हुन्। उनी धादिङ मण्डली यातायात प्रालिका सञ्चालकसमेत रहेको जनाइएको छ।

यातायात प्रालिका प्रबन्धक राजेश प्रजापतिका अनुसार बिहान करिब १०ः३५ बजे चालकलाई सम्पर्क गर्ने प्रयास गरिएको थियो।

उनले भने, “रसुवामा बाढी आएको भन्ने थाहा पाएपछि मैले चालकलाई फोन गरेँ, तर सम्पर्क हुन सकेन। पटक–पटक प्रयास गर्दा पनि कुनै जानकारी प्राप्त भएको छैन।”

बस र त्यसमा सवार यात्रुहरू कुन स्थानमा छन् भन्ने यकिन हुन नसक्दा परिवारजनमा चिन्ता बढेको छ। रसुवाको भोटेकोसी क्षेत्रमा आएको भीषण बाढीका कारण सडक तथा सञ्चार सम्पर्क प्रभावित भएकाले खोजी तथा उद्धार कार्यमा समेत चुनौती देखिएको छ।

सम्बन्धित निकायसँग समन्वय गरी बस र यात्रुहरूको खोजी भइरहेको यातायात प्रालिले जनाएको छ।

Originally published on abcnews.com.np.