काठमाडौं । रसुवाको भोटेकोसी नदीमा आएको बाढीका कारण पृथ्वी राजमार्ग तथा मुग्लिङ–नारायणगढ सडकखण्ड बुधबार रातिदेखि बन्द गरिएको छ।

नेपाल प्रहरीले सूचना जारी गर्दै अर्को जानकारी नआएसम्म दुवै सडकखण्डमा सवारीसाधनको आवागमन पूर्ण रूपमा बन्द गरिएको जनाएको छ।

भोटेकोसी नदीमा आएको बाढीका कारण सडक तथा आसपासका क्षेत्रमा जोखिम बढेकाले यात्रु तथा सर्वसाधारणलाई उच्च सतर्कता अपनाउन प्रहरीले आग्रह गरेको छ।

बाढीका कारण स्थानीय जनजीवन प्रभावित भएको छ। सडकमा थप क्षति हुन सक्ने जोखिम रहेकाले तत्कालै सडक खुल्ने अवस्था नरहेको र सञ्चालनमा ल्याउन केही समय लाग्न सक्ने प्रहरीले जनाएको छ।

प्रहरीले अत्यावश्यक कामबाहेक जोखिमयुक्त क्षेत्रमा यात्रा नगर्न तथा प्रशासन र सुरक्षा निकायले जारी गरेका सूचनाको पालना गर्नसमेत आग्रह गरेको छ।

Originally published on abcnews.com.np.