काठमाडौं । रसुवाको भोटेकोशी नदीमा आएको विनाशकारी बाढीबाट घाइते तथा जोखिममा परेका नागरिकको उद्धारका लागि आज बिहानैदेखि नेपाली सेना र निजी क्षेत्रका हेलिकप्टर परिचालन गरिने भएको छ। प्रभावित क्षेत्रमा फसेका नागरिकलाई उद्धार गरी सुरक्षित स्थानमा पुर्‍याउने तथा गम्भीर घाइतेलाई तत्काल काठमाडौँ ल्याएर उपचार गर्ने तयारी गरिएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकले बाढी प्रभावित क्षेत्रका घाइते तथा जोखिममा रहेका नागरिकको उद्धारलाई प्राथमिकतामा राख्ने निर्णय गरेको हो। गृहमन्त्रालयका प्रवक्ता आनन्द काफ्लेका अनुसार उद्धार गरिएकालाई प्रारम्भिक उपचारका लागि रसुवाको धुन्चेर नुवाकोटको विदुरस्थित नेपाली सेनाको ब्यारेकमा स्थापना गरिने अस्थायी उपचार केन्द्रमा लगिनेछ।

घाइतेको स्वास्थ्य अवस्था र जोखिमको स्तरका आधारमा प्राथमिकता निर्धारण गरी उद्धार तथा उपचारको काम अघि बढाइने जनाइएको छ। गम्भीर अवस्थामा रहेका घाइतेलाई भने हेलिकप्टरमार्फत तत्काल काठमाडौँ ल्याएर विशेषज्ञ उपचार उपलब्ध गराइनेछ।

राहत सामग्री पनि प्रभावित क्षेत्रतर्फ

बाढी प्रभावित नागरिकका लागि आवश्यक राहत सामग्री स्थलमार्गबाट विदुरस्थित नेपाली सेनाको ब्यारेकतर्फ पठाउन थालिएको गृहमन्त्रालयले जनाएको छ। त्यहाँबाट प्रभावित क्षेत्रको अवस्था र पहुँचका आधारमा खाद्यान्न, औषधि तथा अन्य अत्यावश्यक सामग्री वितरण गर्ने तयारी गरिएको छ।

भोटेकोशी क्षेत्रमा आएको बाढीले रसुवा, नुवाकोटलगायत त्रिशूली नदी आसपासका क्षेत्रमा ठूलो मानवीय तथा भौतिक क्षति पुर्‍याएको छ। सडक तथा पुलहरू क्षतिग्रस्त हुँदा कतिपय क्षेत्रमा स्थलमार्गबाट उद्धार गर्न कठिनाइ भएपछि हवाई उद्धारलाई प्राथमिकतामा राखिएको छ।

सरकारले तीनवटै सुरक्षा निकाय, निजी क्षेत्रका हवाई साधन तथा उपलब्ध अन्य स्रोत–साधनलाई खोज, उद्धार, उपचार र राहतमा केन्द्रित गरी परिचालन गर्ने जनाएको छ।

Originally published on abcnews.com.np.