काठमाडौं । रसुवाको भोटेकोसी नदीमा आएको विनाशकारी बाढीका कारण हालसम्म १६२ जनाको मृत्यु भएको छ। नेपाल प्रहरीले सार्वजनिक गरेको विवरणअनुसार बाढी प्रभावित विभिन्न जिल्लामा शव फेला पर्ने क्रम जारी रहेकाले मृतकको संख्या थप बढ्न सक्ने आशंका गरिएको छ।

प्रहरीका अनुसार बाढीबाट सबैभन्दा बढी प्रभावित क्षेत्र तथा नदी तटीय जिल्लाहरूमा खोज तथा उद्धार अभियान जारी छ। हालसम्म रसुवामा २ जना, नुवाकोटमा १२ जना, धादिङमा २७ जना, चितवनमा ६४ जना, गोरखामा २० जना, तनहुँमा ९ जना, नवलपरासी (पूर्व) मा २६ जना र नवलपरासी (पश्चिम) मा २ जनाको शव फेला परेको छ।

नदी किनारमा खोजी तीव्र

भोटेकोसीबाट त्रिशूली हुँदै नारायणी नदी प्रणालीसम्म बाढीको प्रभाव फैलिएकाले तटीय क्षेत्रहरूमा खोजी अभियान तीव्र पारिएको प्रहरीले जनाएको छ। बाढीसँगै बगेका बेपत्ता नागरिकको खोजीका क्रममा विभिन्न जिल्लाका नदी किनारमा शव फेला परिरहेका छन्।

बाढीका कारण ४१ जना घाइते भएका छन्। घाइतेहरूको विभिन्न अस्पतालमा उपचार भइरहेको प्रहरीले जनाएको छ। घाइतेमध्ये केहीको अवस्था गम्भीर रहेको बताइएको छ।

उद्धारमा ३ हजार ३१८ प्रहरी परिचालन

विनाशकारी बाढीपछि उद्धार, राहत तथा सहायताका लागि नेपाल प्रहरीले देशभरबाट ३ हजार ३१८ जना प्रहरी परिचालन गरेको छ। प्रहरी टोलीले प्रभावित क्षेत्रमा बेपत्ताको खोजी, घाइतेको उद्धार, शव व्यवस्थापन तथा राहत वितरणमा सहयोग गरिरहेको छ।

बाढीले रसुवा, नुवाकोट, धादिङ हुँदै त्रिशूली र नारायणी नदी तटीय क्षेत्रका विभिन्न जिल्लामा व्यापक मानवीय तथा भौतिक क्षति पुर्‍याएको छ। नदी किनार तथा प्रभावित क्षेत्रमा खोजी र उद्धार कार्य अझै जारी रहेको नेपाल प्रहरीले जनाएको छ।

Originally published on abcnews.com.np.