काठमाडौं । टप एन्ड टी–२० सिरिजअन्तर्गत नेपाल ‘ए’ टोली आज आफ्नो पाँचौँ खेलमा किंग्समेन एकेडेमीसँग प्रतिस्पर्धा गर्दैछ। अस्ट्रेलियाको डार्विनस्थित मारारा क्रिकेट मैदानमा हुने खेल नेपाली समयअनुसार विहान ९ः१५ बजे सुरु हुनेछ।

चार खेलबाट नेपाल ‘ए’ले दुई जित र दुई हारसहित चार अंक जोडेको छ। आजको प्रतिद्वन्द्वी किंग्समेन एकेडेमीको पनि समान चार अंक रहेको छ। त्यसैले अंक तालिकामा आफूलाई बलियो बनाउने लक्ष्यसहित दुवै टोली मैदानमा उत्रनेछन्।

नेपाल ‘ए’ पछिल्लो समय उत्कृष्ट लयमा देखिएको छ। सुरुआती दुई खेलमा नर्दन टेरिटोरी स्ट्राइक र बंगलादेश हाइ परफर्मेन्स टोलीसँग पराजित भएको नेपालले त्यसपछि लगातार दुई खेल जितेको थियो।

नेपालले होबर्ट हरिकेन्स एकेडेमी र अस्ट्रेलियन क्यापिटल टेरिटोरीलाई पराजित गर्दै प्रतियोगितामा पुनरागमन गरेको हो। अब नेपाल ‘ए’को लक्ष्य लगातार तेस्रो जित निकाल्दै अंक तालिकामा आफ्नो स्थिति थप मजबुत बनाउने हुनेछ।

किंग्समेन पनि लयमा फर्किएको

यता, किंग्समेन एकेडेमीले पहिलो खेलमा अस्ट्रेलियन क्यापिटल टेरिटोरीलाई हराएको थियो। त्यसपछि टोलीले भिक्टोरिया क्रिकेट संघ र नर्दन टेरिटोरीसँग हार बेहोरेको थियो।

तर, पछिल्लो खेलमा किंग्समेनले न्युजिल्यान्ड ‘ए’लाई पराजित गर्दै पुनः लय समातेको छ। यसैले लगातार दुई जितको आत्मविश्वासमा रहेको नेपाल ‘ए’ र पछिल्लो खेलमा बलियो जित निकालेको किंग्समेनबीचको प्रतिस्पर्धा रोमाञ्चक हुने अपेक्षा गरिएको छ।

आजको खेलमा जित निकाल्ने टोली प्रतियोगिताको अंक तालिकामा माथि उक्लने सम्भावना रहेकाले नेपाल ‘ए’का लागि किंग्समेनविरुद्धको भिडन्त महत्वपूर्ण बनेको छ।

Originally published on abcnews.com.np.