काठमाडौं । रोहितकुमार पौडेलको उत्कृष्ट अर्धशतकपछि नेपालले दोस्रो तथा अन्तिम एकदिवसीय अभ्यास खेलमा घरेलु टोली मलेसियासामु १७१ रनको लक्ष्य प्रस्तुत गरेको छ।

क्वालालम्पुरस्थित सेलान्गोर टर्फ मैदानमा टस जितेर पहिले ब्याटिङ गरेको नेपाल ४१.४ ओभरमा सबै विकेट गुमाउँदै १७० रनमा समेटियो।

नेपालका लागि रोहितकुमार पौडेलले सर्वाधिक ६१ रन बनाए। उनले ८६ बल खेल्दै तीन चौका र तीन छक्का प्रहार गरे। गुल्सनकुमार झाले ४५ रनको महत्वपूर्ण योगदान दिए भने कप्तान सन्दीप लामिछानेले १३ रन बनाए।

अर्जुन कुमाल र आसिफ शेखले समान १०–१० रन जोडे। नेपाली टोलीको इनिङ्स सम्हाल्ने क्रममा रोहित र गुल्सनबीच छैटौँ विकेटका लागि ५९ रनको साझेदारी भएको थियो।

मलेसियाका बलर हाबी

मलेसियाका अकिल वाहिदले सर्वाधिक चार विकेट लिए। कप्तान सैयद अजिजले तीन विकेट हात पारे भने रिजवान हैदरले दुई तथा अमिर अजिमले एक विकेट लिए।

नेपालले एसीसी प्रिमियर कपको तयारीस्वरूप मलेसियासँग दुई खेलको एकदिवसीय अभ्यास शृंखला खेलेको हो। पहिलो अभ्यास खेलमा नेपालले मलेसियामाथि ९ विकेटको सानदार जित निकालेको थियो।

अब घरेलु टोली मलेसियाले दोस्रो अभ्यास खेल जित्न १७१ रनको लक्ष्य पछ्याउँदै ब्याटिङ गर्नेछ।

Originally published on abcnews.com.np.