काठमाडौँ । नेपाली कम्युनिस्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले राष्ट्रिय संकटको सामना गर्न सबै राजनीतिक शक्ति एकजुट हुन आग्रह गर्नुभएको छ ।

राष्ट्रिय स्वतन्त्र पार्टीका सभापति रवि लामिछानेको आह्वानमा आयोजित सर्वदलीय बैठकमा बोल्दै उहाँले देश गम्भीर प्राकृतिक विपत्तिको सामना गरिरहेको अवस्थामा राजनीतिक आग्रह–पूर्वाग्रहमा अल्झिनुभन्दा खोजी, उद्धार र राहतमा केन्द्रित हुनुपर्ने बताउनुभएको हो ।

“अहिले देश गम्भीर प्राकृतिक विपत्तिको सामना गरिरहेको छ। यस्तो अवस्थामा लामो बहस वा राजनीतिक आग्रह–पूर्वाग्रहमा अल्झिने होइन, सबै राजनीतिक शक्ति एक ठाउँमा उभिएर खोजी, उद्धार, राहतमा जुट्ने समय हो,” प्रचण्डले भन्नुभएको छ ।

उहाँले तत्कालीन खोजी, उद्धार र राहतसँगै प्राकृतिक विपत्तिको दीर्घकालीन जोखिम न्यूनीकरण तथा रोकथामका लागि वैज्ञानिक, प्राविधिक र नीतिगत अध्ययन गरी राष्ट्रिय रणनीति बनाउनुपर्नेमा जोड दिनुभएको छ ।

खोजी, उद्धार, उपचार, राहत र पुनःस्थापनाका लागि सरकार, राजनीतिक दल तथा सबै सरोकारवाला निकायबीच प्रभावकारी समन्वय गर्दै साझा कार्ययोजनाका साथ अघि बढ्नुपर्ने उहाँको भनाइ छ ।

यसका लागि सम्बन्धित छिमेकी मुलुकसँग तत्काल समन्वय गरी उपलब्ध सूचना तथा पूर्वसूचना संयन्त्रलाई प्रभावकारी रूपमा सक्रिय बनाउनुपर्ने प्रचण्डले बताउनुभएको छ ।

हिमाली क्षेत्रमा पूर्वसूचना प्रणाली बलियो बनाउन जोड

विशेषगरी हिमाली क्षेत्रमा प्राकृतिक विपत्तिको जोखिम र पूर्वसूचना प्रणालीलाई दीर्घकालीन रूपमा बलियो बनाउन नेपालले छिमेकी मुलुक तथा अन्तर्राष्ट्रिय समुदायसँग सहकार्य गर्नुपर्ने प्रचण्डले बताउनुभएको छ ।

जलवायु परिवर्तनको असर भोगिरहेका हिमाली मुलुकका लागि जलवायु न्याय, क्षतिपूर्ति र अन्तर्राष्ट्रिय सहयोगको विषयलाई नेपालले सशक्त रूपमा उठाउनुपर्नेमा उहाँले जोड दिनुभएको छ ।

प्राकृतिक विपत्तिको दीर्घकालीन जोखिम न्यूनीकरणका लागि वैज्ञानिक अध्ययन, प्रभावकारी पूर्वसूचना प्रणाली र अन्तर्राष्ट्रिय सहकार्यलाई प्राथमिकता दिनुपर्ने उहाँको भनाइ छ ।

Originally published on abcnews.com.np.