नुवाकोट । प्रधानमन्त्री बालेन्द्र शाह रसुवाको भोटेकोसी नदीमा बुधबार आएको विनाशकारी बाढीबाट भएको क्षतिको स्थलगत जानकारी लिन नुवाकोटको विदुर पुगेका छन्।

बाढीबाट भएको मानवीय तथा भौतिक क्षतिको अवस्था बुझ्न, बेपत्ता व्यक्तिको खोजी तथा उद्धार कार्यलाई थप प्रभावकारी बनाउन प्रधानमन्त्री शाह बिहीबार दिउँसो सडकमार्ग हुँदै विदुर पुगेका हुन्।

प्रधानमन्त्री शाह विदुर नगरपालिकास्थित श्री नम्बर १ सैन्य तालिम केन्द्रमा प्रशासन तथा सुरक्षा निकायका प्रमुखहरूसँग बाढीपछिको अवस्थाबारे ‘ब्रिफिङ’मा सहभागी भएका छन्।

बैठकमा पूर्वाधार विकासमन्त्री सुनील लम्साल, सूचना तथा सञ्चारमन्त्री डा. विक्रम तिमिल्सिना, बागमती प्रदेशका मुख्यमन्त्री किरण थापामगर तथा नेपाली सेनाका प्रधानसेनापति अशोकराज सिग्देललगायत सहभागी छन्।

उनीहरूलाई नुवाकोटका प्रमुख जिल्ला अधिकारी शम्भुप्रसाद रेग्मी, जिल्ला प्रहरी प्रमुख विपिन रेग्मीलगायत सुरक्षा तथा प्रशासनिक अधिकारीहरूले बाढीबाट भएको मानवीय क्षति, भौतिक संरचनामा पुगेको असर, बेपत्ता व्यक्तिको खोजी र जारी उद्धार अभियानबारे जानकारी गराएका छन्।

भोटेकोसी हुँदै त्रिशूली नदी प्रणालीमा आएको भीषण बाढीले रसुवा, नुवाकोटलगायतका जिल्लामा ठूलो क्षति पुर्‍याएको छ। प्रभावित क्षेत्रमा नेपाली सेना, नेपाल प्रहरी, सशस्त्र प्रहरी तथा अन्य निकाय परिचालन गरी खोजी, उद्धार र राहत वितरण कार्य जारी रहेको छ।

Originally published on abcnews.com.np.