सप्तरी । शिक्षक–कर्मचारी भर्नाका लागि यसअघि स्थगित गरिएको छनोट परीक्षा पुनः सञ्चालन गर्न खोजिएपछि सप्तरीको बलान बिहुल गाउँपालिका–६ स्थित जागेश्वर गहिराइ जनता माध्यमिक विद्यालयमा शनिबार तनाव उत्पन्न भएको छ ।

परीक्षा सञ्चालनको विषयलाई लिएर स्थानीय र सुरक्षाकर्मीबीच विवाद भएपछि विद्यालय परिसरमा झडपको अवस्था सिर्जना भएको हो । विद्यालयको गेट खोल्ने विषयमा नेपाल प्रहरी, सशस्त्र प्रहरी र गाउँ प्रहरीसँग स्थानीयको विवाद भएको स्थानीयले बताएका छन् । घटनाका क्रममा केही व्यक्तिमाथि कुटपिटसमेत भएको स्थानीयको दाबी छ ।

विद्यालयले प्लस टुतर्फ लेखा र अंग्रेजी विषयमा एक–एक जना तथा प्राविधिक धारतर्फ प्रशिक्षक, सहायक प्रशिक्षक र प्रशिक्षण सहायक पदमा करार नियुक्तिका लागि शनिबार छनोट परीक्षा सञ्चालन गर्ने तयारी गरेको थियो ।

यसअघि बुधबारका लागि तय गरिएको परीक्षा विवादपछि स्थगित गरिएको थियो । तर शनिबार पुनः परीक्षा सञ्चालन गर्न खोजिएपछि स्थानीयले विरोध जनाएका थिए । त्यसपछि विद्यालय परिसरमा ठूलो संख्यामा स्थानीय भेला भएका थिए भने सम्भावित तनावलाई नियन्त्रण गर्न सुरक्षाकर्मी परिचालन गरिएको थियो ।

भर्ना प्रक्रियामा ‘सेटिङ’ भएको आरोप

भर्ना प्रक्रियामा आर्थिक चलखेल भएको आरोप लगाउँदै बलान बिहुल गाउँपालिका–६ का वडाध्यक्ष सूर्यकुमार दासले विद्यालयको प्रशासन कक्षमा तालाबन्दी गरेका छन् ।

वडाध्यक्ष दासले विद्यालयका प्रधानाध्यापक भोला यादव, व्यवस्थापन समिति अध्यक्ष तथा छनोट समितिका संयोजक नथुनी दास र शिक्षा समन्वय तथा विकास कार्यालय सप्तरीका शिक्षा समन्वय अधिकारी शशिकुमार यादवबीच मिलेमतो भएको आरोप लगाएका छन् ।

उनले भर्ना प्रक्रियामा ‘सेटिङ’ भएको दाबी गर्दै निष्पक्ष छानबिन गरी परीक्षा प्रक्रियालाई पारदर्शी बनाउन माग गर्दै आएका छन् ।

यसअघि पनि वडाध्यक्ष दासले गत मंगलबार शिक्षा समन्वय तथा विकास कार्यालय सप्तरी परिसरमा धर्ना दिएका थिए ।

विवादका कारण स्थगित परीक्षा पुनः सञ्चालन गर्ने प्रयासले विद्यालयमा तनाव बढेपछि अब परीक्षा प्रक्रिया कसरी अघि बढाउने भन्ने विषय थप जटिल बनेको छ । स्थानीयले निष्पक्ष छानबिनपछि मात्र परीक्षा सञ्चालन गर्नुपर्ने माग गरेका छन् भने विद्यालयतर्फबाट लगाइएको आरोपबारे आधिकारिक धारणा सार्वजनिक हुन बाँकी छ ।

Originally published on abcnews.com.np.