नुवाकोट । तिब्बतबाट आएको भोटेकोसी नदीको बाढीले नुवाकोटको विदुर नगरपालिका–१ स्थित त्रिभुवन त्रिशूली माध्यमिक विद्यालय पूर्णरूपमा क्षति भएको छ। बिहान ९ः१५ बजेतिर आएको बाढीले विद्यालय बगाएको विद्यालयका प्रध्यानाध्यापक राजेन्द्र दवाडीले जानकारी दिए।

प्रध्यानाध्यापक दवाडीले नेपालखबरसँग कुरा गर्दै भने, “विद्यालयमा कक्षा सुरु हुनु अघिको प्रार्थना चलिरहेको थियो, एक्कासि बाढी आएको खबर प्राप्त भयो।” उनले थपे, “धेरैजसो विद्यार्थीलाई विद्यालय माथि रहेको गुम्बामा सार्न भ्याएँ। कतिपय घर जान भ्याइन्छ भन्दै निस्किएका थिए।” उनका अनुसार गुम्बामा रहेका अघिकांश विद्यार्थी अहिले पनि आफैँसँग सुरक्षित छन्।

विदुर नगरपालिका–१ का वडाध्यक्ष लेलिन रञ्जितले अहिलेसम्म कुनै विद्यार्थी हराएको खबर नआएको बताए। “विद्यालय पूर्णरूपमा बगायो, माथितिर बाढी आउनेबित्तिकै सबैलाई सुरक्षित स्थानमा सार्न भन्यौँ,” उनले भने, “केही विद्यार्थी अहिले पनि हेडसरसँग छन्। अरू सबै घर पुगिसकेका छन्। आफ्ना बच्चा हराएको भनेर कोही खोजी गर्न आउनुभएको छैन।”

क्षति र विद्यार्थी संख्या

बाल विकास कक्षादेखि १२ सम्म पढाइ हुने उक्त विद्यालयमा १६ सय ४३ जना विद्यार्थी अध्ययनरत रहेको विद्यालय प्रशासनले जनाएको छ। बाढीले विद्यालयको भवन पूर्णरूपमा क्षति बनाए पनि तीनवटा विद्यालय बस सुरक्षित रहेको बताइएको छ।

Originally published on abcnews.com.np.