चितवन । भोटेकोशी बाढीमा बगेर नारायणी नदीसम्म आइपुगेका पहिचान खुल्न नसकेका १०३ जनाको शव स्थानीय प्रशासनले देवघाटस्थित जंगल क्षेत्रमा माटोमुनि व्यवस्थापन गरेको छ।

बाढीपछि चितवनका विभिन्न स्थानबाट हालसम्म २७२ वटा शव फेला परेको जिल्ला प्रशासनले जनाएको छ। तीमध्ये १० शवको पहिचान खुलेपछि आफन्तले जिम्मा लिएर लगेका छन्।

पहिचान खुल्न नसकेका शवमध्ये १०३ वटा शवलाई आवश्यक विवरण तथा संकेत चिन्ह सुरक्षित राख्दै व्यवस्थापन गरिएको जिल्ला प्रहरी कार्यालय चितवनका प्रहरी प्रमुख एसपी रामेश्वर पौडेलले जानकारी दिए।

डीएनए परीक्षणबाट पहिचान खुले शव निकाल्न सकिने

प्रशासनले शव व्यवस्थापन गरिए पनि भविष्यमा पहिचान खुल्ने सम्भावनालाई भने खुला राखेको जनाएको छ।

शवको सङ्केत, विवरण तथा पहिचानसम्बन्धी आवश्यक अभिलेख सुरक्षित राखिएको छ। भविष्यमा डीएनए परीक्षण वा अन्य प्रक्रियाबाट कुनै शवको पहिचान खुलेमा सम्बन्धित आफन्तले प्रशासनसँग समन्वय गरी शव झिकेर लैजान सक्ने व्यवस्था गरिएको छ।

प्रशासनका अनुसार पहिचान नखुलेका शवलाई लामो समयसम्म खुला अवस्थामा राख्दा स्वास्थ्य तथा वातावरणीय जोखिम बढ्न सक्ने भएकाले सम्मानपूर्वक अन्त्येष्टि तथा व्यवस्थापनको प्रक्रिया अघि बढाइएको हो।

शवको विवरण र संकेत सुरक्षित राखिएकाले आगामी दिनमा आफन्तले खोजी गर्दा तथा पहिचान प्रक्रिया अघि बढाउँदा सहज हुने प्रशासनको विश्वास छ।

भोटेकोशीबाट सुरु भएको बाढी त्रिशूली हुँदै नारायणीसम्म पुगेपछि तल्लो तटीय क्षेत्रमा समेत ठूलो संख्यामा शव फेला परिरहेका छन्। नदीको बहावसँगै बगेर आएका शवको पहिचान र व्यवस्थापन अहिले स्थानीय प्रशासनका लागि थप चुनौती बनेको छ।

Originally published on abcnews.com.np.