काठमाडौं । नेपाली कांग्रेस काभ्रेपलाञ्चोकले भोटेकोसी बाढीबाट प्रभावित नागरिकको राहत तथा उद्धारका लागि १७ लाख ६२ हजार ९५७ रुपैयाँ सहयोग गरेको छ। भदौ १० गते भोटेकोसी नदीमा आएको विनाशकारी बाढीबाट रसुवा, नुवाकोट, धादिङ, गोरखा, तनहुँ, चितवनलगायत जिल्लामा ठूलो मानवीय तथा भौतिक क्षति भएपछि राहत तथा उद्धारका लागि उक्त रकम संकलन गरिएको हो। नेपाली कांग्रेस काभ्रेपलाञ्चोकका सभापति तीर्थ लामाका अनुसार पार्टीका सदस्य तथा शुभेच्छुकबाट संकलित रकम कांग्रेसको केन्द्रीय विपद् व्यवस्थापन कोषमा जम्मा गरिएको हो। कांग्रेस काभ्रेका नेताहरूले पार्टीको केन्द्रीय कार्यालय सानेपामा पुगेर सहमहामन्त्री उदयशमशेर राणा र प्रवक्ता देवराज चालिसेलाई रकम हस्तान्तरण गरेका हुन्। कांग्रेसले उक्त रकम प्रधानमन्त्री दैवी प्रकोप राहत कोषमा पठाउने जनाएको छ। यसअघि नेपाली कांग्रेसले बाढी तथा विपद् प्रभावितका लागि सरकारी कोषमा एक करोड रुपैयाँ सहयोग गर्ने घोषणा गरेको थियो।

Originally published on abcnews.com.np.