काठमाडौं । देशका विभिन्न जिल्लामा सोमबार साँझदेखि वर्षा भइरहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार सोमबार राति ७:५० बजेसम्म रसुवा, नुवाकोट, धादिङ, गोरखा, चितवन, सिन्धुपाल्चोक र लमजुङलगायत जिल्लामा हल्कादेखि मध्यमसम्म वर्षाभइरहेको छ।

पछिल्लो तीन घण्टामा सबैभन्दा धेरै वर्षा स्याङ्जाको दण्डेश्वरमा ८६.२ मिलिमिटर मापन भएको छ। यस्तै गोरखाको आरुघाटमा ६२.४, रुपन्देहीमा ४६.८ र सिन्धुपाल्चोकको मेलम्चीमा २४.२ मिलिमिटर वर्षा भएको महाशाखाले जनाएको छ।

हाल कोशी, बागमती, गण्डकी र लुम्बिनी प्रदेशका केही स्थान, कर्णाली र सुदूरपश्चिम प्रदेशका थोरै स्थान तथा मधेस प्रदेशका एक–दुई स्थानमाहल्कादेखि मध्यमसम्म वर्षा भइरहेको छ।

बाढी–पहिरोको जोखिम

महाशाखाले वर्षा भइरहेका तथा आसपासका क्षेत्रमा थप वर्षाको सम्भावना रहेकाले आवश्यक सतर्कता अपनाउन आग्रह गरेको छ। विशेषगरी पछिल्लो समय बाढी र पहिरोबाट प्रभावित पहाडी तथा नदी तटीय क्षेत्रमा थप वर्षाले जोखिम बढाउन सक्ने देखिएको छ।

यसअघि पनि मौसम महाशाखाले रसुवा, नुवाकोट, धादिङ, गोरखा र चितवनलगायत बाढी प्रभावित क्षेत्रमा मध्यमदेखि भारी वर्षाको सम्भावना रहेको जनाएको थियो।

आज राति कहाँ–कहाँ भारी वर्षा?

महाशाखाका अनुसार सोमबार राति कोशी, बागमती र गण्डकी प्रदेशका हिमाली तथा पहाडी भूभागका केही स्थान तथा लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका थोरै स्थानमा मेघगर्जन र चट्याङसहित मध्यमसम्म वर्षा तथा हिमपातको सम्भावना छ।

त्यस्तै मधेस प्रदेश तथा कोशी, बागमती र गण्डकी प्रदेशका तराई भूभागका केही स्थान र लुम्बिनी तथा सुदूरपश्चिम प्रदेशका तराई भूभागका थोरै स्थानमा मेघगर्जन र चट्याङसहित मध्यमसम्म वर्षा हुनसक्ने पूर्वानुमान छ।

कोशी र बागमती प्रदेशका हिमाली, पहाडी तथा तराई भूभाग तथा गण्डकी प्रदेशका हिमाली र पहाडी भूभागका एक–दुई स्थानमा भारी वर्षाको सम्भावना रहेको छ। सोमबार रातिको पूर्वानुमानमा कोशी र बागमतीका केही हिमाली तथा पहाडी क्षेत्रमा धेरै भारी वर्षासमेत हुनसक्ने उल्लेख छ।

भारी वर्षा हुने क्षेत्रमा गेग्रान बहाव, आकस्मिक बाढी, पहिरो तथा भू–क्षयको जोखिम बढ्न सक्ने भएकाले नदी तथा खोलानाला आसपास बसोबास गर्ने स्थानीय, यात्रु तथा उद्धार तथा राहतमा खटिएका टोलीलाई विशेष सतर्क रहन आग्रह गरिएको छ।

विशेषगरी रसुवा र नुवाकोटका स–साना नदी तथा खोलामा आकस्मिक बाढीको जोखिम उच्च रहेको बाढी पूर्वानुमान महाशाखाले जनाएको छ।

मौसम पूर्वानुमान महाशाखा

Originally published on abcnews.com.np.