काठमाडौं । रसुवाको आमाछोदिङमो गाउँपालिका–१ स्थित हाकु क्षेत्र भोटेकोसी बाढीबाट गम्भीर रूपमा प्रभावित भएको छ। वडाध्यक्ष साङ लामा तामाङका अनुसार हाकु क्षेत्रमा ६५ देखि ७० जना स्थानीय अझै सम्पर्कविहीन छन्।

बाढीले पुल बगाएपछि हाकुबेँसीसँग सडक सम्पर्क विच्छेद भएको छ। विद्युत् र टेलिकम सेवा समेत अवरुद्ध हुँदा स्थानीय थप समस्यामा परेका छन्। वडाध्यक्ष तामाङका अनुसार हाकु क्षेत्रमा घरहरू बाढीले बगाएको अवस्था नरहे पनि जलविद्युत् आयोजनामा काम गर्ने स्थानीयहरू बाढीमा परेका छन्। हाकुबेँसीमा राहत सामग्री पुर्‍याउनसमेत कठिन भएको उनले बताए। उनले लगातार वर्षा भए हाकुबेँसी नै बगाउने जोखिम रहेको भन्दै त्यहाँका बासिन्दालाई सुरक्षित स्थानमा स्थानान्तरण गर्न संघीय सरकारसँग आग्रह गरेका छन्। वडाध्यक्ष तामाङले संघीय सरकार र स्थानीय जनप्रतिनिधिबीच प्रभावकारी समन्वय हुन नसक्दा वास्तविक पीडितले राहत पाउन नसकेको गुनासो गरेका छन्। उनका अनुसार हेलिकोप्टरमार्फत राहत तथा उद्धारका प्रयास भइरहे पनि स्थानीय आवश्यकताअनुसार सामग्री वितरण हुन सकेको छैन। उनले स्थानीय तहसँग समन्वय गरेर उद्धार, राहत र पुनःस्थापनाको काम अघि बढाउन सरकारसँग माग गरेका छन्।

Originally published on abcnews.com.np.