काठमाडौं । रसुवागढी जलविद्युत् आयोजनाभित्र भोटेकोसी बाढीका कारण थुनिएका तथा सम्पर्कविहीन व्यक्तिको उद्धारका लागि गएको टोली आयोजनास्थलमा पुग्न नसकेपछि धुन्चे फर्किएको छ। विद्युत् प्राधिकरणका एक कर्मचारीका अनुसार बाढीका कारण आयोजनाभित्रको अवस्था अत्यन्त जोखिमपूर्ण रहेकाले उद्धार टोलीले थुनिएका व्यक्तिसम्म पुग्न नसकेर फर्किएको हो। रसुवागढी आयोजनाबाट ९३ जना अझै सम्पर्कविहीन रहेको बताइएको छ। उनीहरूमध्ये रसुवागढी हाइड्रोपावर कम्पनीका ४९ जना, दुई जना ज्यालादारी कर्मचारी, निर्माणमा खटिएका शेर्पा हाइड्रो कन्स्ट्रक्सनका ३५ जना, सीडब्ल्यूईका चार जना र भनस कन्स्ट्रक्सनका तीन जना रहेका छन्। भूमिगत डिसेन्डरमा फसेका ६ जनामध्ये चार जना करिब दुई दिन लगाएर आफैँ बाहिर निस्कन सफल भएका थिए। उनीहरूलाई नेपाली सेनाले हेलिकोप्टरमार्फत उद्धार गरी काठमाडौं ल्याएको छ। अन्य तीन जना भने सुरक्षित स्थानमा गएर ज्यान जोगाउन सफल भएको रसुवागढी हाइड्रोपावर कम्पनीले जनाएको छ। कम्पनीका अनुसार आवश्यक उपकरण प्रयोग गरी खोजी गर्न सके थुनिएका व्यक्तिसम्म छिट्टै पुगेर उद्धार गर्न सकिने अवस्था छ। तर आवश्यकताअनुसार पर्याप्त स्रोतसाधन तथा उपकरण उपलब्ध हुन नसक्दा उद्धार टोली आयोजनाभित्र प्रवेश गर्न नसकेको जनाइएको छ। आयोजनाभित्र रहेका व्यक्तिको अवस्थाबारे थप जानकारी लिन तथा उद्धारका लागि आवश्यक उपकरण र प्राविधिक जनशक्ति परिचालन गर्नुपर्ने अवस्था देखिएको छ।

Originally published on abcnews.com.np.