काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले अत्यावश्यक काम नपरी हेलिकोप्टरमार्फत उद्धारको माग नगर्न सम्बन्धित सबैलाई आग्रह गरेको छ। आपत्कालीन अवस्थामा खोज तथा उद्धारका साथै राहत सामग्री ढुवानीका लागि हेलिकोप्टर आवश्यक पर्ने भएकाले न्यून प्रभावित, अप्रभावित तथा उच्च स्थानमा सुरक्षित रहेका व्यक्तिले अनावश्यक रूपमा हवाई उद्धारको माग नगर्न प्राधिकरणले आग्रह गरेको हो। प्राधिकरणकी प्रवक्ता शान्ति महतका अनुसार भोटेकोसी बाढीबाट प्रभावित रसुवा, नुवाकोट, धादिङ, गोरखा र तनहुँबाट हालसम्म २५२ विदेशी र तीन हजार ३४४ नेपाली गरी तीन हजार ५९६ जनाको हवाई उद्धार गरिएको छ। प्राधिकरणले सडकमार्गबाट आवतजावत गर्न सकिने क्षेत्रमा वैकल्पिक मार्ग प्रयोग गर्न सर्वसाधारणलाई अपिल गरेको छ। धादिङबेँसी–परेवाटार–नेपालटार–गजुरीटार–पिपलटार–आदमटार–बेलिनटार–केउरिनीटार हुँदै मास्टार (ह्याम्लेट रेस्टुरेन्ट) भएर पृथ्वी राजमार्गसम्म पुग्ने वैकल्पिक मार्ग सञ्चालनमा रहेको छ। त्यस्तै, रसुवा जोड्ने विदुर–ढिकुरे–चौघडा–आँप्र–नर्जा–लच्याङ–सरमर्थाले–पाटीखर्क–बोगटीटार हुँदै कालिकास्थान–धुन्चे सडक पनि चार चक्के साना सवारीसाधन सञ्चालन हुने गरी सुचारु भएको प्राधिकरणले जनाएको छ। प्राधिकरणले उपलब्ध हवाई साधनलाई अत्यावश्यक खोज तथा उद्धार र राहत सामग्री ढुवानीमा प्रभावकारी रूपमा प्रयोग गर्न सहयोग गरिदिन सम्बन्धित सबैलाई आग्रह गरेको छ।

Originally published on abcnews.com.np.