काठमाडौं । नेपाली कांग्रेसका सांसद खड्कबहादुर बुढाले भोटेकोसी बाढीका कारण सुरुङभित्र फसेकाहरूको उद्धार कार्यलाई तीव्रता दिन सरकारसँग माग गरेका छन्।

बिहीबार बसेको प्रतिनिधिसभा बैठकमा बोल्दै सांसद बुढाले उद्धारका लागि टोली सुरुङको मुखसम्म पुगेको भनिए पनि ठोस परिणाम देखिन नसक्नु चिन्ताजनक रहेको बताए।

उनले पुराना तथा प्रभावहीन उपकरणको भरमा उद्धार सम्भव नहुने भन्दै अत्याधुनिक प्रविधि र आवश्यक जनशक्ति तत्काल परिचालन गर्न सरकारको ध्यानाकर्षण गराए।

“पुराना र प्रभावहीन उपकरणका भरमा उद्धार सम्भव हुँदैन । सञ्चारमाध्यममा उद्धार टोली सुरुङको मुखसम्म पुगेको प्रचार भइरहे पनि उद्धारमा ठोस परिणाम देखिन नसक्नु अत्यन्त चिन्ताजनक छ।”

सांसद बुढाले विपद्को समयमा सरकारले नागरिकको खोजी र उद्धारलाई सर्वोच्च प्राथमिकतामा राख्नुपर्ने बताए।

उनले पीडित परिवारको निरन्तरको आग्रहलाई बेवास्ता नगर्न सरकारलाई आग्रह गर्दै उद्धार कार्यमा कुनै ढिलाइ नगर्न चेतावनीसमेत दिए।

“पीडित परिवारको अनुनय विनयलाई सरकारले अब बेवास्ता नगरोस् । नागरिकको जीवनसँग खेलबाड गर्ने छुट कसैलाई छैन।”

बुढाले सुरुङभित्र फसेकाहरूको अवस्था पहिचान गरी सम्भावित सबै स्रोत, साधन र प्रविधि प्रयोग गरेर उद्धार अभियानलाई द्रुत बनाउन सरकारसँग माग गरेका छन्।

Originally published on abcnews.com.np.