काठमाडौं । राष्ट्रिय स्वतन्त्र पार्टी (रास्वपा) ले रसुवाको भोटेकोसी बाढीबाट प्रभावित तथा बेपत्ता नागरिकको खोज, उद्धार र राहत कार्यलाई थप प्रभावकारी बनाउन सरकारसँग आग्रह गरेको छ।

बिहीबार वनस्थलीस्थित पार्टी केन्द्रीय कार्यालयमा सभापति रवि लामिछानेको अध्यक्षतामा बसेको सचिवालय बैठकले बाढीपीडितको उद्धार तथा राहतलाई थप गति दिन सरकारको ध्यानाकर्षण गराउने निर्णय गरेको हो।

रास्वपा प्रवक्ता जगदिश खरेलका अनुसार बैठकमा अर्थमन्त्री डा. स्वर्णिम वाग्लेले सरकारको हालसम्मको कार्यप्रगतिबारे ब्रिफिङ गरेका थिए।

बैठकले सरकारले सञ्चालन गरिरहेको खोज, उद्धार तथा राहत कार्यलाई सन्तोषजनक रहेको निष्कर्ष निकालेको छ। साथै विपद्को यस कठिन परिस्थितिमा पार्टी सरकारको साथमा रहने प्रतिबद्धता व्यक्त गरेको प्रवक्ता खरेलले जानकारी दिए।

रास्वपाले विशेषगरी भोटेकोसी बाढीबाट पीडित र बेपत्ता नागरिकको खोज तथा उद्धारलाई थप प्रभावकारी र परिणाममुखी बनाउनुपर्नेमा जोड दिएको छ।

बैठकले विपद् प्रभावित नागरिकलाई आवश्यक राहत तथा सहयोग तत्काल उपलब्ध गराउन र उद्धार अभियानलाई अझ व्यवस्थित बनाउन सरकारसँग आग्रह गर्ने निर्णय गरेको हो।

Originally published on abcnews.com.np.