काठमाडौं । नेकपा एमालेका सांसद गुरु बरालले भोटेकोसी बाढीपछि सुरुङभित्र फसेकाहरूको उद्धारमा सरकार गम्भीर रूपमा चुकेको आरोप लगाएका छन्।

बिहीबार बसेको प्रतिनिधिसभा बैठकमा बोल्दै सांसद बरालले सुरुङमा फसेका नागरिकको उद्धारका लागि सरकारले प्रभावकारी र व्यवस्थित ढंगले काम गर्न नसकेको बताए।

“टनेलभित्र फसेकाहरूको उद्धार कार्यमा सरकार गम्भीर रूपमा चुक्यो । दिलोज्यानले यो कामलाई व्यवस्थित गर्न सकेन।”

उनले उद्धार कार्यमा निर्माण क्षेत्रमा काम गरिरहेका कम्पनी तथा निर्माण व्यवसायीलाई समेत तत्काल सहभागी गराउनुपर्ने बताए। निर्माण व्यवसायीको प्राविधिक जनशक्ति, उपकरण र अनुभव उपयोग गर्न सके फसेका नागरिकलाई बचाउन सकिने उनको दाबी थियो।

“निर्माण व्यवसायीलाई त्यस क्षेत्रमा सामेल नगराउने विषयले आज हामी गम्भीर समस्यामा पुगेका छौँ।”

पुनर्निर्माणमा सर्वदलीय संयन्त्र बनाउन माग

सांसद बरालले विपद्पछि हुने अर्बौं रुपैयाँ बराबरको सहयोग वितरण तथा पुनर्निर्माणको काम सरकारले मात्रै प्रभावकारी रूपमा सम्पन्न गर्न नसक्ने बताए।

उनले राहत, पुनर्निर्माण र सहयोग परिचालनलाई व्यवस्थित बनाउन उच्चस्तरीय सर्वदलीय संसदीय समिति गठन गर्नुपर्ने प्रस्ताव अघि सारे।

उक्त समितिमार्फत सरकारले गरिरहेका राहत तथा पुनर्निर्माणका कामको निरीक्षण गर्नुका साथै आवश्यक सहयोग र समन्वय गर्न सकिने उनको भनाइ छ।

बरालले विपद्पछिको पुनर्निर्माणमा राज्यका सबै राजनीतिक दल र सरोकारवाला पक्षलाई सहभागी गराउँदै पारदर्शी, प्रभावकारी र परिणाममुखी संयन्त्र निर्माण गर्न सरकारको ध्यानाकर्षण गराएका छन्।

Originally published on abcnews.com.np.