माथिल्लो त्रिशूली-३ ‘ए’को सुरुङभित्र मान्छे बोलेको आवाज सुनिएपछि मेडिकल टोली चनाखो भएको छ।

१० दिनदेखि त्रिशुली ३ ‘ए’को सुरुङ भित्र फसेका मानिसहरू बोलिरहेको आवाज आज बिहान उद्धार कर्ताले सुनेका हुन्।

सुरुङमा जारी उद्धार स्थलमा नेपाली सेनाको मेडिकल टोली तयारी अवस्थामा राखिएको छ।

यही भदौ १० गते भोटेकोसी नदीमा आएको बाढीपछि सम्पर्कविहीन भएका विद्युत् आयोजनाका कर्मचारी र कामदार सुरुङभित्र बोलेको आबाज सुनिएपछि उनीहरू सकुशल नै रहेको अनुमान उद्धार कर्ताले गरेका छन्।

उद्धार कार्य जारी रहँदा भित्रबाट एकभन्दा बढी व्यक्ति बोलेको आवाज सुनिएको उद्धार कर्ताहरूले बताएका छन्।

उद्धार टोलीले ‘नआत्तिनुहोस्, हामी उद्धार गर्दैछौँ’ भनेपछि भित्रबाट ‘हुन्छ’ भन्ने प्रतिक्रिया प्राप्त भएको छ।

उद्धारका क्रममा आवश्यक पर्ने यातायात तथा उद्धार व्यवस्थापनका लागि नेपाल विद्युत् प्राधिकरणले नेपाली सेनासँग समन्वय गरिरहेको छ।

सम्भावित आकस्मिक अवस्थालाई ध्यानमा राख्दै हेलिकोप्टर तथा स्थल एम्बुलेन्स तयारी अवस्थामा राखिएको छ भने अस्पतालहरूलाई समेत पूर्वसूचना दिइएको छ।

यससँगै सुरुङबाट उद्धार गरिएकाहरूलाई तत्काल स्वास्थ्य उपचार उपलब्ध गराउन आवश्यक मेडिकल व्यवस्थापनसमेत तयारी अवस्थामा राखिएको सेनाले जनाएको छ।

उद्धार तथा राहतसम्बन्धी सम्पूर्ण काम नेपाली सेनाको नियन्त्रणमा भइरहेको छ। सुरुङभित्र फसेकाहरूलाई सुरक्षित निकाल्न सेनाले सक्दो प्रयास गरिरहेको जनाएको छ।

Originally published on abcnews.com.np.