काठमाडौं । भोटेकोसी बाढीका कारण नियमित सेवन गर्दै आएका औषधि गुमाएका ज्येष्ठ नागरिकलाई लक्षित गर्दै नुवाकोटको विदुर नगरपालिका–३, सिर्खलीमा निःशुल्क स्वास्थ्य शिविर सञ्चालन गरिएको छ।

शनिबार सञ्चालन गरिएको शिविरबाट २०० जनाले स्वास्थ्य सेवा लिएका छन्। तीमध्ये १०१ जना ज्येष्ठ नागरिक थिए। उनीहरूमा ४८ महिला र ५३ पुरुष रहेका आयोजकले जनाएको छ।

भदौ १० गते रसुवाको भोटेकोसीमा आएको भीषण बाढीले सुगर, प्रेसरलगायत नसर्ने तथा दीर्घरोगका नियमित औषधि बगाएपछि प्रभावित नागरिकलाई शिविरमार्फत स्वास्थ्य परीक्षण, विशेषज्ञ चिकित्सकीय परामर्श र आवश्यक औषधि उपलब्ध गराइएको हो।

शिविरमा ज्येष्ठ नागरिकका रोग, मुटु रोग, दन्त तथा अर्थोपेडिकलगायत स्वास्थ्य सेवा प्रदान गरिएको थियो।

बाढीपछि मानसिक तनावमा रहेका ज्येष्ठ नागरिक तथा उनीहरूका परिवारका सदस्यलाई लक्षित गरी २५ जनालाई तनाव व्यवस्थापन तथा मनोसामाजिक परामर्शसमेत दिइएको आयोजकले जनाएको छ।

उद्धार तथा व्यवस्थापनमा खटिएका नेपाली सेना र सशस्त्र प्रहरी बलका बेसलाई पनि आवश्यक महत्त्वपूर्ण औषधि उपलब्ध गराइएको थियो।

विभिन्न सामाजिक संघसंस्थाको संयुक्त आयोजनामा शिविर सञ्चालन गरिएको हो।

Originally published on abcnews.com.np.