जाजरकोट । भेरी करिडोरअन्तर्गत जाजरकोट–डोल्पा सडकखण्डमा सुख्खा पहिरो खसेर अवरुद्ध भएको सडक पुनः सञ्चालनमा आएको छ।
डोल्पाको त्रिपुरासुन्दरी नगरपालिका–५, छिप्रेदहमा आइतबार बिहान करिब साढे ८ बजे सुख्खा पहिरो खसेपछि सडक अवरुद्ध भएको थियो। सडक बन्द हुँदा डोल्पाबाट बाहिरिने र डोल्पा भित्रिने सवारीसाधन छिप्रेदहमै रोकिएका थिए।
इलाका प्रहरी कार्यालय करवगार्डबाट खटिएको प्रहरी टोलीले सम्बन्धित निकायसँग समन्वय गरी पहिरो हटाएपछि सडक सञ्चालनमा आएको जिल्ला प्रहरी कार्यालय डोल्पाले जनाएको छ।
सडक सञ्चालनमा आए पनि पहिरो खस्ने जोखिम कायमै रहेकाले यात्रु तथा सवारी चालकलाई सावधानी अपनाउन प्रहरीले आग्रह गरेको छ।
Originally published on abcnews.com.np.
प्रतिक्रिया दिनुहोस्