सुर्खेत । कर्णाली राजमार्गअन्तर्गत कालीकोटको खाँडाचक्र नगरपालिका–७ र ८ को सीमाना पिली र बिर्तामोडबीचको रातोपहाडमा सडक भासिएको छ । सडक भासिँदा राजमार्ग पूर्ण रूपमा अवरुद्ध भएको छ ।

जिल्ला प्रहरी कार्यालय कालीकोटका अनुसार, आइतबार साँझ रातोपहाड क्षेत्रमा करिब पाँचदेखि सात मिटर सडक भासिएपछि कर्णाली राजमार्गमा यातायात सञ्चालन पूर्ण रूपमा बन्द भएको हो ।

लगातार वर्षा भइरहेकाले सडक थप भासिन सक्ने जोखिम बढेको छ । अन्य स्थानमा समेत पहिरो र सडक अवरोध हुन सक्ने जोखिम रहेको प्रहरीले जनाएको छ । सडक अवरुद्ध भएपछि राजमार्ग हुँदै आवतजावत गर्ने सवारीसाधन प्रभावित भएका छन् ।

जिल्ला प्रहरी कार्यालय कालीकोटले यात्रु तथा सवारी चालकलाई यात्रा गर्नुअघि सडकको अवस्था बुझेर मात्र आवतजावत गर्न आग्रह गरेको छ । प्रहरीले वर्षाका कारण कर्णाली राजमार्गका विभिन्न स्थानमा जोखिम बढेकाले आवश्यक सतर्कता अपनाउन अनुरोध गरेको छ ।

Originally published on abcnews.com.np.