काठमाडौँ, ३१ भाद्र ।  कर्णाली प्रदेशको विकासका लागि विज्ञहरूको बीचमा घनिभूत बहस भएको छ । शनिवार रूपान्तरण नेपालद्वारा आयोजित “कर्णाली प्रदेशको विकाससम्बन्धी बहस कार्यक्रम” अन्नपूर्ण चुलो, काठमाडौंमा सम्पन्न भएको छ ।

बहस कार्यक्रममा कर्णाली प्रदेशमा पर्यटनको सम्भावना र चुनौंती विषयमा कार्यपत्र प्रा।डा। नन्दबहादुर सिंहले, क्षेत्रिय विकासको रणनीतिक योजनासम्बन्धी कार्यपत्र क्षेत्रिय विकास विज्ञ योगेन्द्र शाहीले र कृषि र प्राकृतिक स्रोत व्यवस्थापनसम्बन्धी कार्यपत्र कृषि विज्ञ डा। सर्वराज खड्काले प्रस्तुत गर्नु भएको थियो ।

प्रस्तुत कार्यपत्रमाथी राष्ट्रिय योजना आयोगका सदस्य मीनबहादुर शाही, भूगोलविद् प्रा।डा। कविप्रसाद पोखरेल, पर्यटनविद् पदम भण्डारी र विकास विज्ञ डा। दिपेन्द्र रोकायाले टिप्पणी सहित आफ्नो विचार राख्नु भएको थियो । त्यस्तै विज्ञहरूले प्रस्तुत गर्नु भएको कार्यपत्रमाथी कर्णाली प्रदेश सभाका सदस्य धर्मराज रेग्मी, पूर्व राज्य मन्त्री कुन्ती शाही, सङ्घीय सांसद पार्वती विशुन्खे, पूर्व पर्यटन मन्त्री एवम् कर्णाली प्रदेशका प्रमुख प्रतिपक्ष दलका नेता जीवनबहादुर शाही, पूर्व पर्यटनमन्त्री एवम् कर्णाली प्रदेश सभाका सदस्य यामलाल कँडेल, कर्णाली प्रदेशका सभामुख राजबहादुर शाहीलगायतले समिक्षात्मक विचार व्यक्त गर्नु भएको थियो ।

बहस कार्यक्रम अर्थ मन्त्रालयका पूर्व प्रमुख आर्थिक सल्लाहकार प्रा.डा. पुण्यप्रसाद रेग्मीको अध्यक्षतामा सम्पन्न भएको थियो । आयोजक संस्था रूपान्तरण नेपालका तर्फबाट कार्यक्रममा सहभागीहरूलाई स्वागत गर्दै संस्थाका अध्यक्ष मोहन शाहीले यही कार्यक्रममा आधारित भई कर्णाली प्रदेशको विकास सम्बन्धी विशेषाङ्कका रूपमा अर्धप्राज्ञिक एवम् अर्धवार्षिक जर्नल “मान्नमी” को यो अङ्क प्रकाशन गरिने कुरा बताउनु भएको थियो ।