डडेल्धुरा, ६ मंसिर । डडेल्धुराबाट डोटी जाँदै गरेको बस दुर्घटना हुँदा १६ जनाको मृत्यु भएको छ । से १ क २९३ नम्बरको बस आज साँझ डडेल्धुरा र डोटीको सीमानामा पर्ने रडुवा खोलामा दुर्घटनामा परेको हो ।

रडुवा खोलामा आज साँझ स्कुल बस दुर्घटना हुँदा १६ जनाको घटनास्थलमै मृत्यु भएको हो । क्षेत्रीय ट्राफिक प्रहरी कार्यालय अत्तरीयाका प्रहरी उपरिक्षक केदार रजौलेले १६ जनाको घटनास्थलमै मृत्यु भएको पुष्टि गरे ।

दुुर्घटनामा परी ३० जना घाईते भएका छन् । उपचारका लागि अस्पताला पुराईएका मध्ये ५ जनाको पनि मृत्यु भएको खवर आए पनि त्यो भने पुष्टि हुन नसकेको प्रहरी उपरिक्षक रजौलेले बताए ।

घटनास्थलमा तीन वटै सुरक्षा निकाय सहित ट्राफिक प्रहरी र स्थानीय वासिन्दा उद्धारमा खटिएका छन् । घाईते भएकाहरुलाई अस्पताल पुराउने क्रम जारी रहेको छ । राति परिसकेकाले उद्दारमा कठिनाई भईरहेको जिल्ला प्रहरी कार्यालय डडेल्धुराका प्रमुख प्रहरी नायव उपरिक्षक डम्वर केसीले बताए ।

बस सडकबाट करिब ३ सय मिटर तल खोलामा खसेको छ । वसमा ४० भन्दा बढी सवार रहेको बताईएको छ। बस डोटीको शिखर नगरपालिका अन्तर्गत बान्डुरीसैन स्थित पिसजोन एकाडेमीको हो ।