काठमाडौँ । रसुवाको भोटेकोशी नदीमा आएको विनाशकारी बाढीमा परी घाइते भएका ६३ जनाको काठमाडौँका विभिन्न अस्पतालहरूमा उपचार भइरहेको छ ।

नेपाल प्रहरीले शुक्रबार साँझ ५:०० बजे सार्वजनिक गरेको पछिल्लो तथ्याङ्कअनुसार घाइतेहरूलाई उद्धार गरी उपचारका लागि राजधानीका नौवटा विभिन्न अस्पतालमा भर्ना गरिएको हो ।

प्रहरीको रिपोर्टअनुसार सबैभन्दा बढी ३१ जना घाइतेहरूको महाराजगञ्जस्थित त्रि.वि. शिक्षण अस्पताल (टिचिङ) मा उपचार भइरहेको छ । त्यसैगरी राष्ट्रिय ट्रमा सेन्टरमा २२ जना घाइतेहरू उपचाररत छन् ।

राजधानीका अन्य अस्पतालहरूमा पनि घाइतेहरूको उपचार जारी छ । जसअनुसार नर्भिक अस्पताल, वीर अस्पताल र मनमोहन अस्पतालमा २-२ जनाको उपचार भइरहेको छ । यस्तै, गम्भीर तथा सामान्य घाइते भएका अन्य ४ जनाको विभिन्न अस्पतालमा उपचार भइरहेको छ ।

जसमा ग्रान्डी अस्पताल, मनमैजुस्थित शुभम् अस्पताल, ग्रीन सिटी अस्पताल र छाउनीस्थित वीरेन्द्र सैनिक अस्पतालमा १-१ जना घाइतेको उपचार भइरहेको विवरण प्रहरीले सार्वजनिक गरेको छ ।

Originally published on abcnews.com.np.