काठमाडौँ । भोटेकोशीमा भीषण बाढी निम्त्याएको लाङटाङ लिरुङ क्षेत्रमा फेरि ठूलो बाढी आउन सक्ने जोखिम देखिएको छ। हिमनदीको मुहान क्षेत्रमा पानी जम्मा हुँदै गएकाले नेपाल र चीन दुवैतर्फ उच्च सतर्कता अपनाउनुपर्ने विज्ञहरूले बताएका छन्।

सम्भावित जोखिम र त्यसबाट हुने क्षति न्यूनीकरणका उपायबारे नेपाल तथा चीनका विज्ञबीच छलफल जारी रहेको छ।

चीनमा रहेका नेपालका विपद् विज्ञ वसन्तराज अधिकारीका अनुसार हिमनदीको मुहानको ठूलो हिस्सा खसेर बनेका खाल्डामा पानी जम्मा भएर ताल बनेको छ। उक्त पानी भरिएर बनेको अस्थायी बाँध फुटेमा पुनः ठूलो बाढी आउन सक्ने जोखिम रहेको उहाँले बताउनुभयो।

“माथिबाट हिउँको ढिक्कासहितको पहिरो बजारिँदा नदी छेउमै बनेका खाल्टाखुल्टीमा पानी जमेको देखिएको छ। वरिपरि बुधबारको बाढीले कच्चा ड्याम सिर्जना गरेको छ। पानी भरिएको खण्डमा त्यो फुटेर बाढी आउने जोखिम कायमै छ,” अधिकारीले भन्नुभयो।

बुधबार हिमाली क्षेत्रमा जम्मा भएको लेदोसहितको पानी ल्हेन्दे खोलामा मिसिएपछि नेपालतर्फ भोटेकोशी नदीमा ठूलो बाढी आएको थियो।

५० लाख घनमिटर पानी जम्मा हुने जोखिम

राष्ट्रिय विपद् जोखिम न्यूनीकरण तथा व्यवस्थापन प्राधिकरणका जलस्रोत विज्ञ राजेन्द्र शर्माले पनि उक्त क्षेत्रमा पोखरी बनेर पानी जम्मा भइरहेको पुष्टि गर्नुभएको छ।

प्राधिकरणको उच्चस्तरीय टोली र चिनियाँ पक्षबीच बिहीबार सम्भावित जोखिमबारे छलफल भएको थियो। छलफलमा नेपाल र चीन दुवैतर्फ भविष्यमा हुन सक्ने क्षति न्यूनीकरणका लागि उच्च सतर्कता अपनाउनुपर्नेमा जोड दिइएको शर्माले जानकारी दिनुभयो।

चिनियाँ पक्षबाट प्राप्त जानकारी उद्धृत गर्दै शर्माले भन्नुभयो, “चट्टानसहित हिउँको ढिक्का खसेको स्थानमा बिहीबार दिउँसोसम्ममा २० लाख घनमिटर पानी जम्मा भइसकेको अवस्था छ। माथिबाट थप ३० लाख घनमिटर पानी खसेर जम्मा हुने सम्भावना उच्च छ।”

माथिबाट थप पानी आएर जम्मा भएको पोखरी फुटेमा त्यसले अर्को ठूलो बाढी निम्त्याउन सक्ने जोखिम रहेको विज्ञहरूले बताएका छन्।

यसकारण सम्भावित जोखिमको निरन्तर निगरानी, समयमै सूचना आदानप्रदान तथा आवश्यक परे तल्लो तटीय क्षेत्रका नागरिकलाई सुरक्षित स्थानमा सार्ने तयारी गर्नुपर्नेमा विज्ञहरूले जोड दिएका छन्।

Originally published on abcnews.com.np.