काठमाडौँ, १० चैत । चिनियाँ कम्पनी चाइना ओभरसिज इन्जिनियरिङ ग्रुप लिमिटेड (कोभेक)ले निर्माणको जिम्मा पाएको भेरी–बबई डाइभर्सन आयोजनाको सुरुङको काम अन्तिम चरणमा पुगेको छ ।

काम अन्तिम चरणमा पुगे सगै नयाँ वर्षका दिन ब्रेक थ्रु गर्ने गरी काम भइरहेको आयोजनाका निर्देशक सञ्जीव बरालले जानकारी दिए ।

निर्देशक बरालका अनुसार बिहीबारसम्म ११ किलोमिटर ७ सय ५० मिटर सुरुङ खनिसकिएको छ । ‘अब करिब ४ सय ५० मिटर सुरुङ खन्न बाँकी रहेको छ,’ उनले भने, ‘बढीमा २० देखि २५ दिनभित्रै सुरुङको ‘ब्रेक थ्रु’ गर्न सकिन्छ ।’ वैशाख १ मै सुरुङको ‘ब्रेक थ्रु’ गर्ने आन्तरिक तयारी भइरहेको उनले बताए । नेपालमै पहिलोपटक टनेल बोरिङ मेसिन (टिबिएम) प्रयोग गरिएको भेरी–बबई डाइभर्सन आयोजनाको काम १० फेबु्रअरी २०१५ बाट सुरु भएको थियो । २८ मार्च २०२० सम्ममा सम्पन्न गर्ने आयोजनाको लक्ष्य भए पनि त्यसको एक वर्षअघि नै सुरुङ निर्माण सकिन लागेको हो । विगतमा सुस्त गतिमा काम भएको भन्ने आरोप लागेपनि निर्देशक बराल पुगेपछि भने कामले तिव्रता पाएको थियो ।

आयोजना सम्पन्न भएसँगै बाँके र बर्दियाको ५१ हजार हेक्टर जमिनमा बाह्रै महिना सिँचाइ सुविधा पुर्‍याउन सकिने लक्ष्य आयोजनाले लिएको छ । सुरुङ निर्माणपछि भेरी नदीको पानी प्रतिसेकेन्ड ४० घनमिटर बबईमा खसालिनेछ । चिनियाँ कम्पनी चाइना ओभरसिज इन्जिनियरिङ गु्रप लिमिटेड (कोभेक)ले निर्माणको जिम्मा पाएको थियो । सुरुङ निर्माण सुरु गरिएको ३५ महिनामा सुरुङको काम सकिएको बरालले बताए । आयोजनामार्फत हात्तीखाल आसपासका क्षेत्रमा सिँचाइ, ग्रामीण विद्युतीकरण र ग्रामीण सडक सुधारको काम पनि गरिएको छ ।